पुरंदर (प्रतिनिधी) :
काळेवाडी परिसरात रस्ता ओलांडत असताना एसटी बसची जोरदार धडक बसल्याने ८५ वर्षीय ज्येष्ठ नागरिकाचा मृत्यू झाल्याची दुर्दैवी घटना घडली. ही घटना गुरुवारी (दि. ३०) दुपारी सुमारे ४ वाजण्याच्या सुमारास घडली.
नामदेव मारुती कुंजीर (वय ८५, रा. आंबळे रेल्वे स्टेशन, ता. पुरंदर) असे मृत व्यक्तीचे नाव आहे. मिळालेल्या माहितीनुसार, कुंजीर हे काळे लॉन्ससमोर रस्ता ओलांडत असताना भरधाव एसटी बस (एमएच १४ एमएच २६४६) ने त्यांना धडक दिली.
या अपघातात त्यांच्या डोक्याला गंभीर दुखापत झाली. स्थानिक नागरिकांनी तात्काळ त्यांना ग्रामीण रुग्णालय, सासवड येथे उपचारासाठी दाखल केले. मात्र, वैद्यकीय अधिकाऱ्यांनी तपासणीनंतर उपचारापूर्वीच त्यांचा मृत्यू झाल्याचे घोषित केले.
अपघाताची माहिती मिळताच पोलिसांनी घटनास्थळी धाव घेतली. प्राथमिक तपासात एसटी बस चालक सिद्धेश्वर प्रल्हाद घाडगे (वय ३५, रा. दळवी विहार सोसायटी, सासवड) याने निष्काळजीपणे वाहन चालविल्यामुळे हा अपघात झाल्याचे समोर आले आहे. या प्रकरणी संबंधित चालकाविरुद्ध गुन्हा दाखल करण्यात आला आहे.
