आजरा (प्रतिनिधी) :
रायजर्स ट्रेक फाउंडेशन, महाराष्ट्र यांच्या वतीने आयोजित राज्यस्तरीय सामान्यज्ञान स्पर्धेत आजरा येथील व्यंकटराव हायस्कूल व ज्युनिअर कॉलेजच्या विद्यार्थ्याने उल्लेखनीय यश संपादन केले आहे. इयत्ता ९ वी (अ) मधील विद्यार्थी संस्कार संजय तेजम याने तालुकास्तरावर द्वितीय क्रमांक पटकावून शाळेच्या शिरपेचात मानाचा तुरा रोवला आहे.
महाराष्ट्रभरातून विद्यार्थ्यांनी सहभाग घेतलेल्या या स्पर्धेचे आयोजन विद्यार्थ्यांच्या बौद्धिक कौशल्याला चालना देण्यासाठी करण्यात आले होते. अत्यंत चुरशीच्या या स्पर्धेत संस्कारने आपल्या उत्कृष्ट सामान्यज्ञानाच्या जोरावर तालुक्यात दुसरे स्थान मिळवले.
या यशाबद्दल मुख्याध्यापक व शिक्षकांनी समाधान व्यक्त केले. विद्यार्थ्याच्या गौरवासाठी विद्यालयात छोटेखानी कार्यक्रमाचे आयोजन करण्यात आले. यावेळी प्राचार्य श्री. एम. एम. नागुर्डेकर यांनी संस्कारचे अभिनंदन करून त्याला पुढील वाटचालीस शुभेच्छा दिल्या. तसेच पर्यवेक्षिका सौ. व्ही. जे. शेलार आणि वर्गशिक्षिका सौ. ए. डी. पाटील यांनीही त्याच्या मेहनतीचे कौतुक केले.
संस्कारच्या या यशामुळे त्याचे सर्वत्र अभिनंदन होत असून, ग्रामीण भागातील विद्यार्थीही योग्य मार्गदर्शन व मेहनतीच्या जोरावर राज्यस्तरीय स्पर्धांमध्ये आपली छाप पाडू शकतात, हे त्याने सिद्ध केले आहे. पालक व आजरा परिसरातून त्याच्यावर अभिनंदनाचा वर्षाव होत आहे.
