वर्धा, दि. १ मे (प्रतिनिधी)
महाराष्ट्र दिन व कामगार दिनानिमित्त वर्धा येथे उत्साहपूर्ण आणि शिस्तबद्ध वातावरणात विविध कार्यक्रम पार पडले. पोलिस अधीक्षक कार्यालयात सकाळी ८.३० वाजता पोलिस अधीक्षक सौरभ कुमार अग्रवाल यांच्या हस्ते ध्वजारोहण करण्यात आले. यावेळी पोलिस दलातील अधिकारी व कर्मचारी मोठ्या संख्येने उपस्थित होते.
यानंतर सकाळी ९ वाजता पोलिस मुख्यालयाच्या मैदानावर राज्याचे पालकमंत्री डॉ. पंकज भोयर यांच्या हस्ते ध्वजारोहण करण्यात आले. या प्रसंगी विविध पोलिस पथकांनी आकर्षक संचलन सादर केले. पालकमंत्र्यांनी संचलनाची पाहणी करून उपस्थितांना मार्गदर्शन केले.
उपस्थितांना संबोधित करताना डॉ. भोयर यांनी महाराष्ट्र दिन व कामगार दिनाच्या शुभेच्छा देत राज्य शासनाच्या विविध योजना जनतेपर्यंत पोहोचविणे, शेतकरी कल्याण आणि पोलिस यंत्रणा अधिक सक्षम करण्यासाठी सरकार कटिबद्ध असल्याचे सांगितले.
यावेळी वर्ष २०२५ साठी “पोलिस महासंचालक सन्मानचिन्ह” जाहीर झालेल्या अधिकारी व कर्मचाऱ्यांचा पालकमंत्र्यांच्या हस्ते सत्कार करण्यात आला. सन्मानितांमध्ये स.पो.नि. मंगेश भोयर, अमोल लगड, भारत पिसुडे, हवालदार सतीश दरवरे, दिनेश बोथकर आणि सुनयना डोंगरे यांचा समावेश होता.
कार्यक्रमास जिल्हाधिकारी, पोलिस अधिकारी, स्वातंत्र्यसैनिक तसेच नागरिक मोठ्या संख्येने उपस्थित होते.
