श्रीगोंदा (प्रतिनिधी)
श्रीगोंदा तालुक्यातील चांभुर्डी येथे दि. १ मे २०२६ रोजी बुद्ध पौर्णिमेनिमित्त गौतम बुद्ध यांच्या मूर्तीची विधिवत स्थापना करण्यात आली. भंते डॉ. सुबोध बोधी यांच्या हस्ते हा सोहळा पार पडला. यावेळी भारतीय बौद्ध महासभा अहिल्यानगर दक्षिण जिल्हाध्यक्ष, त्यांची कार्यकारिणी, तालुका पदाधिकारी, चांभुर्डी ग्रामशाखा व ग्रामस्थ मोठ्या संख्येने उपस्थित होते.
संध्याकाळी ६ वाजता गौतम बुद्ध यांच्या मूर्तीची भव्य मिरवणूक काढण्यात आली. वाजत-गाजत निघालेल्या या मिरवणुकीत समाज बांधवांचा उत्स्फूर्त सहभाग पाहायला मिळाला. मिरवणुकीनंतर नियोजित स्थळी भंते डॉ. सुबोध बोधी यांनी विधिवत पूजा करून मान्यवर व उपस्थितांच्या साक्षीने मूर्तीची स्थापना केली. यावेळी बुद्ध आणि डॉ. बाबासाहेब आंबेडकर यांच्या घोषणा देऊन परिसर दुमदुमून गेला.
यानंतर आयोजित सभास्थळी डॉ. बाबासाहेब आंबेडकर, छत्रपती शिवाजी महाराज, महात्मा ज्योतिबा फुले, लोकशाहीर अण्णाभाऊ साठे आदी महापुरुषांच्या प्रतिमांना पुष्पहार अर्पण करण्यात आले. समता सैनिक दलाच्या जवानांनी मानवंदना दिली.
या कार्यक्रमासाठी सारोळा, कोरेगाव, कडूस, रांजणगाव, काष्टी तसेच इतर गावांमधूनही मोठ्या संख्येने समाज बांधव उपस्थित होते. कार्यक्रमाच्या शेवटी भारतीय बौद्ध महासभा दक्षिणेचे जिल्हाध्यक्ष राजेंद्र साळवे यांनी आभार मानले. त्यानंतर भजनाचा कार्यक्रमही पार पडला.
चौकट:
या पवित्र कार्यासाठी धम्मबंधु संजय कांबळे (संस्थापक अध्यक्ष, तथागत बुद्धिष्ट सोसायटी, अहमदनगर) यांनी गौतम बुद्ध यांची मूर्ती दान दिली.
