मारेगाव (प्रतिनिधी)
मारेगाव शहरातील मार्डी चौक येथे छत्रपती शिवाजी महाराज यांच्या पुतळा उभारणीवरून शनिवारी तणावाचे वातावरण निर्माण झाले. रात्रीच्या वेळी काही युवकांनी चौकात पुतळा उभारल्याची घटना घडली असून सकाळी ही बाब समोर येताच प्रशासनाने तो पुतळा हटवून ताब्यात घेतला.
मार्डी चौक हा वनी–यवतमाळ महामार्गावरील महत्त्वाचा चौक असून, येथे पोलीस ठाणे, पंचायत समिती तसेच महसूल अधिकाऱ्यांचे निवासस्थान अगदी जवळ आहे. परिसरात सीसीटीव्ही कॅमेरे व नियमित पोलीस गस्त असूनही ही घटना घडल्याने प्रशासनाच्या कार्यक्षमतेवर प्रश्नचिन्ह उपस्थित केले जात आहे.
सकाळी फिरण्यासाठी बाहेर पडलेल्या नागरिकांना चौकात छत्रपती शिवाजी महाराज यांचा पुतळा दिसताच अनेकांनी आनंद व्यक्त केला. मात्र, काही वेळातच प्रशासनाने हा पुतळा अनधिकृत असल्याचे सांगत तो हटवला. यामुळे शिवप्रेमींमध्ये नाराजी पसरली असून “भावनांचा अपमान झाला” अशी प्रतिक्रिया नागरिकांनी व्यक्त केली.
दरम्यान, स्थानिक प्रशासनाने स्पष्ट केले की पुतळा उभारण्यासाठी जिल्हाधिकारी कार्यालयाची पूर्वपरवानगी आवश्यक आहे. संबंधितांनी अधिकृत परवानगी घेतल्यास प्रशासन सहकार्य करेल, असे वरिष्ठ अधिकाऱ्यांनी सांगितले.
या घटनेनंतर काही नागरिकांनी संबंधित पोलीस अधिकाऱ्यांवर कारवाईची मागणी केली असून, तालुक्यात तणावपूर्ण वातावरण निर्माण झाले आहे.
