मारेगाव (प्रतिनिधी)
मारेगाव तालुक्यातील मार्डी व नवरगाव येथे झालेल्या ग्रामपंचायत पोटनिवडणुकीत विजयी उमेदवारांनी दणदणीत विजय संपादन करत परिसरात जल्लोषाचे वातावरण निर्माण केले.
मार्डी सर्कलमधील ग्रामपंचायत सदस्य सुधाकर डाहुले यांच्या निधनामुळे रिक्त झालेल्या जागेसाठी ही पोटनिवडणूक घेण्यात आली होती. या निवडणुकीत मनीषा प्रशांत नागपुरे आणि माधुरीताई अंकुश गुरनुले यांच्यात चुरशीची लढत झाली. अखेर मनीषा नागपुरे यांनी विजय मिळवत प्रतिस्पर्धी उमेदवाराचा पराभव केला. त्यांच्या विजयामुळे संपूर्ण मार्डी परिसरात आनंदाची लाट उसळली.
दरम्यान, नवरगाव येथेही प्रभाग क्रमांक १ आणि ३ साठी पोटनिवडणूक पार पडली. प्रभाग क्रमांक १ मध्ये हर्षल शंकर शेंडे यांनी १०० मते मिळवत विजय मिळवला. तर प्रभाग क्रमांक ३ मध्ये संकेत गणेश डावरे यांनी १५६ मते मिळवत सुरेश नथुजी डावरे यांचा पराभव करून विजय संपादन केला.
या विजयाचा आनंद ग्रामस्थांनी गुलाल उधळून व विजयी उमेदवारांसह जल्लोषात साजरा केला. एकूणच, दोन्ही गावांतील पोटनिवडणुका शांततेत व सुरळीत पार पडल्याची माहिती प्राप्त झाली आहे.
