जळकोट (प्रतिनिधी) – जळकोट शहरात अनधिकृत बॅनर लावण्यावर नगर पंचायत प्रशासनाने कडक भूमिका घेतली असून, १ मेपासून अशा बॅनरवर बंदी लागू करण्यात आली आहे. नियमांचे उल्लंघन करणाऱ्यांवर दंडात्मक कारवाई करण्यात येणार असल्याची माहिती मुख्याधिकारी रोहित आर. बोळे यांनी दिली आहे.
शहरात विविध ठिकाणी विनापरवाना मोठ्या प्रमाणावर बॅनर लावले जात असल्यामुळे वाहतूक, स्वच्छता व शहराच्या सौंदर्यावर परिणाम होत असल्याची बाब प्रशासनाच्या निदर्शनास आली होती. यावर उपाय म्हणून हा निर्णय घेण्यात आला आहे.
नगर पंचायत कार्यालयात बॅनर छपाई करणाऱ्या व्यावसायिकांची बैठक घेऊन त्यांना स्पष्ट सूचना देण्यात आल्या. अनधिकृत बॅनर लावणारे तसेच त्यांची छपाई करणाऱ्यांवरही योग्य ती कारवाई करण्यात येईल, असा इशारा यावेळी देण्यात आला.
नागरिकांनी व व्यावसायिकांनी नियमांचे पालन करून प्रशासनाला सहकार्य करावे, असे आवाहनही नगर पंचायतकडून करण्यात आले आहे.
