अंदरसुल/ प्रतिनिधी:
विखरणी (ता. येवला, जि. नाशिक) येथील लक्ष्मी इंग्लिश मिडीयम पब्लिक स्कूल अँड ज्युनियर कॉलेज येथे १ मे रोजी महाराष्ट्र दिन व आंतरराष्ट्रीय कामगार दिन उत्साहात आणि देशभक्तीपूर्ण वातावरणात साजरा करण्यात आला.
कार्यक्रमाच्या प्रारंभी सामाजिक कार्यकर्ते तथा पालक प्रतिनिधी सीताराम पा. शिंदे यांच्या हस्ते ध्वजारोहण करण्यात आले. यावेळी संस्थेचे अध्यक्ष डॉ. मोहन शेलार, सचिव सौ. ज्योती शेलार, प्राचार्य भास्कर खेमनर, प्राचार्या वनिता पवार यांच्यासह शिक्षक-शिक्षिका, पालक, विद्यार्थी व शिक्षकेत्तर कर्मचारी मोठ्या संख्येने उपस्थित होते.
कार्यक्रमादरम्यान अध्यक्ष डॉ. मोहन शेलार यांनी महाराष्ट्र दिनाचे ऐतिहासिक व सामाजिक महत्त्व स्पष्ट करत विद्यार्थ्यांना प्रेरणादायी मार्गदर्शन केले. प्राचार्य भास्कर खेमनर यांनी प्रास्ताविकातून या दिवसाच्या उद्देशावर प्रकाश टाकला.
यावेळी विद्यार्थ्यांनी देशभक्तीपर गीत, नृत्य आणि विविध सांस्कृतिक कार्यक्रम सादर करून वातावरण भारावून टाकले. संपूर्ण कार्यक्रम शिस्तबद्ध आणि प्रेरणादायी वातावरणात पार पडला.
या उपक्रमातून उपस्थितांना महाराष्ट्र दिन व कामगार दिनाचे महत्त्व समजले असून विद्यार्थ्यांमध्ये राष्ट्रप्रेमाची भावना अधिक दृढ झाली.
