अंदरसुल/ प्रतिनिधी:
अंदरसूल येथील मातोश्री शांताबाई गोविंदराव सोनवणे शैक्षणिक संकुलात १ मे रोजी महाराष्ट्र दिन व आंतरराष्ट्रीय कामगार दिन उत्साहात साजरा करण्यात आला.
कार्यक्रमाच्या अध्यक्षस्थानी संस्थेचे अध्यक्ष अरुण भांडगे हे होते. प्रमुख पाहुणे म्हणून सरचिटणीस अमोल सुभाषराव सोनवणे, डॉ. आदित्यराज मकरंद सोनवणे तसेच अंदरसूल केंद्र प्रमुख नारायण डोखे उपस्थित होते. कार्यक्रमाची सुरुवात मान्यवरांच्या हस्ते ध्वजारोहणाने झाली.
यावेळी “वंदे मातरम्”, “जन गण मन” आणि “जय जय महाराष्ट्र माझा” या गीतांचे सामूहिक गायन करण्यात आले. त्यानंतर सहकार व शिक्षण महर्षी स्व. गोविंदराव (नाना) सोनवणे यांच्या पुतळ्याला पुष्पहार अर्पण करून अभिवादन करण्यात आले. शिक्षक अजहर खतीब यांनी प्रस्तावना सादर करून पाहुण्यांचा परिचय करून दिला.
कार्यक्रमात विविध क्षेत्रात प्राविण्य मिळवलेल्या विद्यार्थ्यांचा सत्कार करण्यात आला. तसेच माजी विद्यार्थी डॉ. आदित्यराज सोनवणे व केंद्र प्रमुख नारायण डोखे यांनी मार्गदर्शनपर मनोगत व्यक्त केले. अध्यक्षीय भाषणात अरुण भांडगे यांनी महाराष्ट्र दिनाच्या शुभेच्छा देत विद्यार्थ्यांना प्रेरणा दिली.
या दिवशी विद्यार्थ्यांना वार्षिक निकालही वितरित करण्यात आला. कार्यक्रमास प्रशासकीय अधिकारी राजेंद्र गायकवाड, माजी सरपंच विनिता अमोल सोनवणे, प्राचार्य अल्ताफ खान, सचिन सोनवणे, मुख्याध्यापिका जयश्री परदेशी, प्राचार्या डॉ. सुवर्णा कडलग तसेच सर्व शिक्षक, पालक व शिक्षकेत्तर कर्मचारी मोठ्या संख्येने उपस्थित होते.
कार्यक्रमाचे सूत्रसंचालन नीलिमा देशमुख यांनी केले तर आभार प्रदर्शन अजीम पटेल यांनी केले.
संपूर्ण कार्यक्रम उत्साहपूर्ण व शिस्तबद्ध वातावरणात पार पडला.
