▶ अभिलेख, ई-पॉश नोंदी व प्रत्यक्ष साठ्यात विसंगती; शेतकरी हितासाठी प्रशासनाचे कठोर पाऊल
पाथरी (प्रतिनिधी):
तालुक्यातील कृषी सेवा केंद्रांमध्ये अभिलेख, ई-पॉश मशीन नोंदी आणि प्रत्यक्ष खत साठ्यात मोठी तफावत आढळल्याने कृषी विभागाने धडक कारवाई करत एकाच वेळी आठ केंद्रांवर छापे टाकले. या कारवाईत सहा केंद्रांचे परवाने तात्पुरते निलंबित करण्यात आले असून दोन केंद्रांना कडक इशारा देण्यात आला आहे.
एप्रिल महिन्यात राबविण्यात आलेल्या विशेष तपासणी मोहिमेत काही केंद्रांकडून खत साठा उपलब्ध असतानाही शेतकऱ्यांना न देणे, विक्री नोंदी अपूर्ण ठेवणे तसेच ई-पॉश व्यवहारात विसंगती आढळून आली. या अनियमिततेमुळे शेतकऱ्यांचे आर्थिक नुकसान होत असल्याचे स्पष्ट झाले.
कारवाईअंतर्गत जगदंब अॅग्रो एजन्सी (पाथरी) यांचा परवाना १७ एप्रिल ते १६ मेपर्यंत एका महिन्यासाठी निलंबित करण्यात आला आहे. मातोश्री कृषी भंडार (पाथरी) यांचा परवाना २७ एप्रिल ते २६ मेपर्यंत निलंबित करण्यात आला आहे. सर्वोदय फार्मर प्रोड्यूसर कंपनी लिमिटेड (पाथरी) यांचा परवाना १५ दिवसांसाठी निलंबित करण्यात आला असून तेजस ट्रेडिंग अँड फर्टिलायझर्स व ओंकार ट्रेडर्स (पाथरी) या दोन्ही केंद्रांचे परवाने सात दिवसांसाठी निलंबित करण्यात आले आहेत.
दरम्यान, समृद्धी सीड्स अँड फर्टिलायझर्स आणि दिनेश कृषी सेवा केंद्र (पाथरी) यांना नियमांचे काटेकोर पालन करण्याबाबत सक्त ताकीद देण्यात आली आहे.
खत साठा, विक्री नोंदी व ई-पॉश व्यवहारात पारदर्शकता राखणे बंधनकारक असल्याचे प्रशासनाने स्पष्ट केले असून नियमांचे उल्लंघन करणाऱ्यांवर यापुढेही कठोर कारवाईचा इशारा देण्यात आला आहे.
ही कारवाई जिल्हा अधीक्षक कृषी अधिकारी डी. एम. चव्हाण यांच्या मार्गदर्शनाखाली करण्यात आली. या धडक कारवाईमुळे तालुक्यातील इतर कृषी सेवा केंद्रांमध्ये खळबळ उडाली आहे.
