पातुर | ग्रामीण प्रतिनिधी
पातुर तालुक्यातील गोळेगाव येथील देशसेवेत कार्यरत असलेल्या सीमा रक्षक जवान धम्माभाऊ मोहाडे यांच्या वृद्ध आई-वडिलांना गॅस सिलेंडर मिळवण्यासाठी गेल्या महिनाभरापासून मोठी ससेहोलपट सहन करावी लागत होती. मात्र, ही बाब समजताच आलेगाव येथील सामाजिक कार्यकर्ते निलेश कापकर यांनी तत्परता दाखवत त्यांना घरपोच गॅस सिलेंडर उपलब्ध करून दिला.
जवान धम्माभाऊ मोहाडे देशाच्या सीमेवर कर्तव्य बजावत असताना त्यांच्या घरी वृद्ध आई-वडील एकटेच राहतात. वडील भीमराव मोहाडे हे तोंडाच्या कॅन्सरने ग्रस्त असून त्यांची प्रकृती नाजूक आहे. अशा परिस्थितीत गेल्या महिनाभरापासून घरातील गॅस संपलेला होता, मात्र ई-केवायसीसह विविध अडचणींमुळे त्यांना गॅस मिळत नव्हता.
दरम्यान, निलेश कापकर हे त्यांच्या तब्येतीची विचारपूस करण्यासाठी भेट दिली असता ही समस्या समोर आली. परिस्थितीची जाणीव होताच त्यांनी स्वतः गॅस एजन्सीकडे जाऊन सिलेंडर आणून दिला आणि वृद्ध दांपत्याला दिलासा दिला.
या घटनेनंतर जवानाच्या आईने अकोला जिल्हाधिकारी व पातुर तहसीलदार यांच्याकडे विनंती केली आहे की, सैनिकांच्या वृद्ध आई-वडिलांसाठी गॅस एजन्सींनी घरपोच सेवा सुरू करावी तसेच ई-केवायसी प्रक्रिया सुलभ करावी.
याबाबत सामाजिक कार्यकर्ते निलेश कापकर यांनीही प्रशासनाला आवाहन करत सांगितले की, “सीमेवर देशाचे रक्षण करणाऱ्या सैनिकांच्या कुटुंबीयांना अशा मूलभूत सेवांसाठी त्रास होऊ नये. प्रशासनाने तत्काळ याकडे लक्ष देऊन आवश्यक त्या सूचना द्याव्यात.”
या घटनेमुळे प्रशासनाच्या कार्यपद्धतीवर प्रश्नचिन्ह उपस्थित होत असून, सैनिकांच्या कुटुंबीयांना भेडसावणाऱ्या समस्यांकडे तातडीने लक्ष देण्याची मागणी होत आहे.
