पनवेल (प्रतिनिधी) : पनवेल पंचायत समितीच्या नवनिर्वाचित सभापती रंजना सदाशिव वास्कर यांनी पदभार स्वीकारताच लोकहिताच्या कामांना सुरुवात केली असून, आपटा विभागातील दुर्गम घेरावाडी गावात बोरवेल व सोलर पंपाची सुविधा उपलब्ध करून दिली आहे.
ही कामे पंचायत समितीच्या शेष निधीतून पूर्ण करण्यात आली. अनेक वर्षांपासून पिण्याच्या पाण्यासाठी ग्रामस्थांना लांब अंतर पायपीट करावी लागत होती. मात्र आता बोरवेलमुळे गावात पाणी उपलब्ध झाले असून सोलर पंपामुळे वीज सुविधाही निर्माण झाल्याने गावात आनंदाचे वातावरण पसरले आहे.
घेरावाडी हे गाव दीर्घकाळ मूलभूत सुविधांपासून वंचित होते. मात्र सभापती रंजना वास्कर यांच्या तत्परतेमुळे गावातील पाणी व वीज या प्राथमिक गरजा पूर्ण झाल्या असून ग्रामस्थ अंधारातून प्रकाशाकडे वाटचाल करत असल्याची भावना व्यक्त केली जात आहे.
रंजना वास्कर या कुंडेवहाळ गावचे माजी आदर्श सरपंच सदाशिव वास्कर यांच्या पत्नी तसेच राज्य परिषद सदस्य अरुण शेठ भगत यांच्या कन्या आहेत. त्यांना कुटुंबातूनच राजकीय व सामाजिक कार्याचा वारसा लाभला आहे.
कुंडेवहाळ गावाला प्रथमच त्यांच्या रूपाने पंचायत समिती सभापती पद मिळाल्याने परिसरात आनंदाचे वातावरण असून, पुढील काळातही अशाच लोकहिताच्या कामांची अपेक्षा ग्रामस्थांकडून व्यक्त केली जात आहे.
