बिलोली : कुंडलवाडी शहरात प्रथमच कामगार दिन आणि महाराष्ट्र दिन उत्साहपूर्ण वातावरणात साजरे करण्यात आले. नगराध्यक्षा सौ. प्रेरणाताई गजानन कोटलावार यांच्या पुढाकारातून आयोजित या विशेष कार्यक्रमात शहरातील कामगार व शेतकरी वर्गाचा सन्मान करण्यात आला.
या उपक्रमाद्वारे कष्टकरी वर्गाच्या योगदानाची दखल घेत त्यांचा सत्कार करण्यात आला. “कामगार आणि शेतकरी हेच समाजाचे खरे आधारस्तंभ आहेत,” असा संदेश या कार्यक्रमातून देण्यात आला. या अभिनव संकल्पनेचे नागरिकांकडून मोठ्या प्रमाणात स्वागत होत असून, शहरात सामाजिक ऐक्य अधिक दृढ झाल्याचे दिसून आले.
यावेळी पोलीस सहाय्यक निरीक्षक ज्ञानेश्वर शिंदे, नगराध्यक्षा प्रतिनिधी गजानन कोटलावार, उपनगराध्यक्षा प्रतिनिधी शैलेश ऱ्याकावार, नगरसेवक राजेश्वर उत्तरवार, प्रकाश पाटील अर्जुने, डॉ. प्रशांत सब्बनवार, रमेश इरलावार, संजय गोनेलवार, साईनाथ भातनाते, संजय भास्कर, सचिन कोटलावार, गंगाधर कोटलावार, नगरसेविका सौ. नेहा गट्टूवार, तसेच अनेक मान्यवर व नागरिक मोठ्या संख्येने उपस्थित होते.
या आगळ्यावेगळ्या उपक्रमामुळे कुंडलवाडी शहरात कष्टकरी वर्गाबद्दल आदराची भावना अधिक बळकट झाली असून, नगराध्यक्षा प्रेरणाताई कोटलावार यांच्या कार्याचे सर्वत्र कौतुक होत आहे.
