अहेरी (प्रतिनिधी) : धर्मराव शिक्षण मंडळ, अहेरी संचलित राजे धर्मराव विद्यालय तथा कनिष्ठ महाविद्यालय, सिरोंचा येथे माजी विद्यार्थ्यांच्या वतीने ‘गुरु-शिष्य मेळावा’ आणि स्नेहमिलन सोहळ्याचे आयोजन करण्यात आले आहे. हा कार्यक्रम रविवार, दिनांक १० मे २०२६ रोजी आयोजित करण्यात येणार असल्याची माहिती आयोजकांनी दिली.
या स्नेहमिलन सोहळ्याच्या माध्यमातून जुन्या आठवणींना उजाळा देण्याचा आणि शालेय जीवन पुन्हा अनुभवण्याचा प्रयत्न केला जाणार आहे. “एक दिवसाची शाळा” या संकल्पनेतून विविध खेळ, सांस्कृतिक कार्यक्रम, मनोरंजन उपक्रम तसेच माजी शिक्षकांचा सत्कार आणि सहभोजनाचे आयोजन करण्यात आले आहे.
या उपक्रमाचा मुख्य उद्देश म्हणजे माजी विद्यार्थ्यांनी आपल्या शाळेशी नाळ जपावी, तसेच पुढील पिढीसाठी प्रेरणादायी ठरावे हा आहे. माजी विद्यार्थ्यांमध्ये सामाजिक बांधिलकी आणि जबाबदारीची जाणीव निर्माण करण्यासाठी हा उपक्रम महत्त्वपूर्ण ठरणार असल्याचे प्राचार्य गणेश तगरे यांनी सांगितले.
दरम्यान, या कार्यक्रमाची माहिती माजी आदिवासी मंत्री तथा गडचिरोलीचे माजी पालकमंत्री राजे श्रीमंत अंब्रिशराव महाराज यांना देण्यात आली असून त्यांनी माजी विद्यार्थ्यांच्या या उपक्रमाचे कौतुक करत कार्यक्रमासाठी शुभेच्छा दिल्या आहेत.
