मीरा-भाईंदर (प्रतिनिधी) : घोडबंदर येथील नाना शंकर शेठ आगार येथे मीरा-भाईंदर महानगरपालिका परिवहन कर्मचारी वर्गातर्फे भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त भव्य कार्यक्रमाचे आयोजन करण्यात आले. यंदा जयंतीचे अकरावे वर्ष असल्याने कार्यक्रम विशेष उत्साहात व जल्लोषात साजरा करण्यात आला.
कार्यक्रमाच्या अध्यक्षस्थानी संतोष विकास गोरे यांची निवड करण्यात आली होती. त्यांच्या मार्गदर्शनाखाली सर्व कर्मचाऱ्यांनी एकजुटीने सहभाग नोंदवत कार्यक्रम शिस्तबद्ध व यशस्वीपणे पार पाडला.
या प्रसंगी उपस्थित अधिकारी वर्गाला भारतीय संविधानाची उद्देशिका भेट स्वरूपात देऊन संविधान मूल्यांचा प्रसार करण्याचा स्तुत्य उपक्रम राबविण्यात आला. तसेच जयंतीनिमित्त “एक वही, एक पेन” हा सामाजिक उपक्रम आयोजित करण्यात आला. या उपक्रमांतर्गत कर्मचाऱ्यांनी उत्स्फूर्त सहभाग नोंदवत वही व पेन जमा केले व ते अनाथ आश्रमातील विद्यार्थ्यांना वाटप करण्यात आले.
कार्यक्रमात सांस्कृतिक भाषणेही पार पडली. यातून डॉ. आंबेडकर यांच्या विचारांचा व कार्याचा गौरव करण्यात आला. सर्व कामगारांनी सक्रिय सहभाग घेत कार्यक्रमाची शोभा वाढवली.
नियोजनबद्ध आखणी, समन्वय आणि सामाजिक बांधिलकी यामुळे हा जयंती सोहळा अधिक प्रभावी ठरला. कर्मचाऱ्यांच्या एकत्रित प्रयत्नांमुळे कार्यक्रम मोठ्या उत्साहात व यशस्वीपणे पार पडला.
