कन्नड (प्रतिनिधी) : कन्नड येथे उपजिल्हा रुग्णालय तातडीने सुरू करावे, अशी मागणी नगराध्यक्ष फरीन बेगम अब्दुल जावेद यांनी केली. नवनियुक्त वैद्यकीय अधिकारी डॉ. दत्ता देवगावकर यांनी पदभार स्वीकारल्यानंतर आयोजित सत्कार सोहळ्यात हा विषय ठळकपणे मांडण्यात आला.
कन्नड येथील ग्रामीण रुग्णालयात दररोज दोनशे ते तीनशे रुग्ण उपचारासाठी येत असल्याने येथे उपजिल्हा रुग्णालयासारखीच गर्दी होत असल्याचे यावेळी सांगण्यात आले. त्यामुळे प्रलंबित असलेले उपजिल्हा रुग्णालय सुरू करण्यासाठी आमदार संजना ताई जाधव यांच्याकडे पाठपुरावा करणार असल्याचेही स्पष्ट करण्यात आले.
विशेष म्हणजे, रुग्णालयातील ऑपरेशन थिएटर दुरुस्तीमुळे बंद असल्याने रुग्णांची गैरसोय होत आहे. याबाबत बोलताना डॉ. दत्ता देवगावकर यांनी सांगितले की, उपजिल्हा रुग्णालयाचा प्रस्ताव शासनाकडे प्रलंबित आहे. हा प्रश्न मार्गी लावण्यासाठी आमदार संजना जाधव व नगराध्यक्ष फरीन बेगम अब्दुल जावेद यांनी पुढाकार घ्यावा, अशी अपेक्षा त्यांनी व्यक्त केली. तसेच ऑपरेशन थिएटरचे नूतनीकरण पूर्ण झाले असून ते लवकरच सुरू करण्यात येणार असल्याचेही त्यांनी सांगितले.
या कार्यक्रमाला माजी वैद्यकीय अधिकारी डॉ. गायकवाड, डॉ. पवार, दंतवैद्य डॉ. एन. एस. सरवदे, यासीन खान, बाळू पगारे, राजू कमिटी, शेख गोकुळ राठोड, मोगल वाघ, संजय भालेराव, योगेश अंभोरे, राहुल पवार, संतोष पवार, राजू धनेधर, विठ्ठल शिरसे आदी मान्यवर उपस्थित होते.
कार्यक्रमाच्या शेवटी डॉ. अनिरुद्ध गायकवाड यांनी आभार प्रदर्शन केले.
