उमरखेड (प्रतिनिधी) : विडूळ येथील एका शेतकऱ्याचा मारहाणीत जखमी झाल्यानंतर उपचारादरम्यान मृत्यू झाल्याची धक्कादायक घटना समोर आली आहे. या घटनेमुळे परिसरात खळबळ उडाली असून उमरखेड पोलिस ठाण्यात मर्ग नोंद करण्यात आली आहे.
गजानन नारायण पेंदेवाड (वय ४५) असे मृत शेतकऱ्याचे नाव आहे. मृताच्या पत्नीच्या तक्रारीनुसार, १० एप्रिल रोजी गावातील काही व्यक्तींनी त्यांना बोलावून घेत वाद घालत मारहाण केली. या घटनेबाबत संबंधितांविरोधात पोलिसांत तक्रार देण्यात आली होती.
मारहाणीनंतर गजानन पेंदेवाड यांची प्रकृती खालावल्याने त्यांना प्रथम विडूळ येथील सरकारी दवाखान्यात दाखल करण्यात आले. मात्र प्रकृतीत सुधारणा न झाल्याने पुढील उपचारासाठी नांदेड येथील शासकीय रुग्णालयात हलविण्यात आले.
१६ एप्रिल रोजी नांदेडहून उपचार घेऊन परत येत असताना वारंगा फाट्याजवळ दुपारी सुमारे २ वाजण्याच्या सुमारास खाजगी बसमध्ये त्यांचा मृत्यू झाला. मृत्यूचे नेमके कारण अद्याप अस्पष्ट असून ते वैद्यकीय अहवालानंतर स्पष्ट होणार असल्याचे पोलिसांनी सांगितले.
या प्रकरणी उमरखेड पोलिसांनी मर्ग नोंद करून पुढील तपास सुरू केला आहे. पोलिस निरीक्षक शंकर पांचाळ यांच्या मार्गदर्शनाखाली विनायक रामोड व दिलीप चव्हाण तपास करत आहेत.
