कडेगाव (प्रतिनिधी) : गांधी एज्युकेशन सोसायटी, कुंडल संचलित चिंचणी (अं.) येथील श्री शिवाजी हायस्कूलमध्ये सन १९५७ ते २०२५ पर्यंतच्या विविध बॅचमधील माजी विद्यार्थ्यांचा स्नेहबंध मेळावा रविवारी (दि. ३ मे) मोठ्या उत्साहात पार पडला. अनेक वर्षांनंतर एकत्र आलेल्या विद्यार्थी-शिक्षकांनी जुन्या आठवणींना उजाळा देत कार्यक्रम रंगतदार केला.
कार्यक्रमाच्या प्रारंभी विद्यालयातील शिक्षक व माजी विद्यार्थ्यांचा सत्कार करण्यात आला. शालेय जीवनात ज्ञान, विज्ञान व सुसंस्कारांचे धडे देणाऱ्या गुरुजनांविषयी कृतज्ञता व्यक्त करण्यात आली.
या वेळी मुख्याध्यापक अरुण सावत यांनी प्रस्ताविक मार्गदर्शन करताना स्नेहबंध मेळाव्याचे महत्त्व स्पष्ट केले. शालेय जीवनातील नातेसंबंध आयुष्यभर टिकणारे असून गाव व शाळेच्या विकासासाठी माजी विद्यार्थ्यांनी योगदान द्यावे, असे आवाहन त्यांनी केले.
१९५९ च्या बॅचचे माजी विद्यार्थी पी. सी. जाधव यांनी आपल्या मनोगतात शिक्षक-विद्यार्थी नात्याचे महत्त्व अधोरेखित केले. “शाळेने दिलेले संस्कार आणि शिक्षणामुळेच आपण आयुष्यात पुढे जाऊ शकलो,” असे सांगत त्यांनी शाळेच्या विकासासाठी नेहमीच सहकार्य करण्याची ग्वाही दिली.
माजी विद्यार्थ्यांनी आपल्या आयुष्यातील अनुभव मांडत सुख-दुःखाच्या आठवणी शेअर केल्या. दीर्घ काळानंतर झालेल्या भेटीमुळे सर्वांच्या चेहऱ्यावर आनंद ओसंडून वाहत होता. जणू काही पुन्हा शालेय जीवनात परतल्याची भावना सर्वांच्या मनात दाटून आली होती.
या निमित्ताने अनेक माजी विद्यार्थ्यांनी शाळेसाठी रोख रक्कम, धनादेश तसेच विविध शैक्षणिक साहित्य देणगी स्वरूपात दिले. भविष्यात विद्यार्थ्यांसाठी आधुनिक सुविधा व प्रयोगशाळा उभारण्यासाठी सहकार्य करण्याचा संकल्प व्यक्त करण्यात आला. दरवर्षी दिवाळीच्या काळात अशा स्नेहमेळाव्याचे आयोजन करण्याची अपेक्षा देखील व्यक्त करण्यात आली.
कार्यक्रमाचे सूत्रसंचालन राहुल कुंभार यांनी केले, तर आभार प्रदर्शन सौ. वैशाली मोहिते यांनी केले. अत्यंत भावनिक आणि आनंददायी वातावरणात हा स्नेहबंध मेळावा पार पडला.
चौकट : स्पर्धा परीक्षेत श्री शिवाजी हायस्कूलची आघाडी
स्पर्धा परीक्षेत यश मिळवलेल्या आकांक्षा माने व करिष्मा शिखलगार यांचा पुष्पगुच्छ देऊन सत्कार करण्यात आला. यावेळी आकांक्षा माने हिने “आई-वडील, गुरुजी व मित्रांच्या मार्गदर्शनामुळेच हे यश मिळाले,” असे सांगत विद्यालयाचे नाव देशभरात उज्ज्वल करण्याची इच्छा व्यक्त केली.
