सिंधुदुर्गनगरी (प्रतिनिधी) : शासकीय वैद्यकीय महाविद्यालय व रुग्णालय, सिंधुदुर्ग येथे अत्याधुनिक ‘सी-आर्म’ मशीनचे लोकार्पण मत्स्यव्यवसाय व बंदरे तथा पालकमंत्री नितेश राणे यांच्या हस्ते करण्यात आले. या कार्यक्रमास आमदार निलेश राणे, जिल्हाधिकारी तृप्ती धोडमिसे, अधिष्ठाता डॉ. अनंत डवंगे तसेच वैद्यकीय अधिकारी व कर्मचारी मोठ्या संख्येने उपस्थित होते.
जिल्हा नियोजन समितीच्या निधीतून उपलब्ध करून देण्यात आलेले हे अत्याधुनिक ‘सी-आर्म’ मशीन अस्थिव्यंगोपचार विभागासाठी अत्यंत उपयुक्त ठरणार आहे. या मशीनच्या सहाय्याने हाडे व सांधे यांच्याशी संबंधित गुंतागुंतीच्या शस्त्रक्रिया अधिक अचूक, सुरक्षित आणि जलद पद्धतीने करता येणार आहेत.
विशेषतः अपघातग्रस्त रुग्ण, फ्रॅक्चर, सांध्यांच्या शस्त्रक्रिया तसेच विविध ऑर्थोपेडिक प्रक्रियांमध्ये या यंत्राचा मोठा फायदा होणार आहे. आधुनिक तंत्रज्ञानाच्या साहाय्याने रुग्णांवरील उपचार अधिक प्रभावीपणे करण्यास डॉक्टरांना मदत होणार आहे.
या मशीनमुळे सिंधुदुर्ग जिल्ह्यातील रुग्णांना प्रगत उपचारांची सुविधा स्थानिक स्तरावर उपलब्ध होणार असून, बाहेरच्या मोठ्या शहरात जाण्याची गरज कमी होणार आहे. त्यामुळे रुग्णांचा वेळ, खर्च आणि श्रम यांचीही मोठी बचत होणार असल्याची माहिती देण्यात आली.
