आजरा (प्रतिनिधी) : ग्रामीण भागातील आरोग्य सेवा सक्षम करण्याच्या दृष्टीने भादवण (ता. आजरा) परिसरासाठी महत्त्वाचा निर्णय घेण्यात आला असून श्री. संजय केसरकर यांच्या सातत्यपूर्ण पाठपुराव्यामुळे जिल्हा परिषद कोल्हापूरमार्फत भादवण प्राथमिक आरोग्य केंद्राला नवीन रुग्णवाहिका प्रदान करण्यात आली आहे.
भादवण परिसरातील नागरिकांना तातडीची आरोग्य सेवा वेळेत उपलब्ध व्हावी, यासाठी ३० सप्टेंबर २०२५ रोजी संजय केसरकर यांनी जिल्हा परिषद कोल्हापूरचे मुख्य कार्यकारी अधिकारी यांच्याकडे अधिकृत मागणी केली होती. या मागणीचा त्यांनी सातत्याने पाठपुरावा केल्यानंतर ४ मे २०२६ रोजी ही रुग्णवाहिका केंद्राला मिळाली.
या रुग्णवाहिकेमुळे भादवणसह पंचक्रोशीतील अनेक गावांना मोठा लाभ होणार आहे. आपत्कालीन परिस्थितीत रुग्णांना तातडीने मोठ्या रुग्णालयात हलवणे सुलभ होणार असून वेळेत उपचार मिळाल्यामुळे अनेकांचे जीव वाचण्यास मदत होणार आहे.
या सुविधेमुळे ग्रामीण भागातील आरोग्य पायाभूत सुविधांना अधिक बळकटी मिळाली असून नागरिकांनी समाधान व्यक्त केले आहे. जनतेच्या प्रश्नांसाठी सातत्याने प्रयत्न करणाऱ्या नेत्याची ओळख संजय केसरकर यांनी निर्माण केली असल्याचे ग्रामस्थांनी सांगितले.
रुग्णवाहिका उपलब्ध करून दिल्याबद्दल भादवण परिसरातील नागरिकांकडून त्यांचे अभिनंदन करण्यात येत आहे.
