शहादा,दि.५
कवयित्री बहिणाबाई चौधरी उत्तर महाराष्ट्र विद्यापीठाने नुकतीच मागील वर्षांच्या शैक्षणिक अंकेक्षणाची (Academic Audit) यादी जाहीर केली आहे. या महत्त्वपूर्ण मूल्यांकनात शहादा येथील पूज्य साने गुरुजी विद्या प्रसारक मंडळाच्या कला, विज्ञान व वाणिज्य वरिष्ठ महाविद्यालयाने घवघवीत यश संपादन करत ‘अ’ दर्जाचे मानांकन प्राप्त केले आहे. महाविद्यालयाच्या या कामगिरीमुळे संपूर्ण शिक्षण क्षेत्रात कौतुक होत आहे.
विद्यापीठाच्या कार्यक्षेत्रातील महाविद्यालयांकडून ऑनलाईन पद्धतीने अर्ज मागवून हे शैक्षणिक अंकेक्षण पार पडले. यामध्ये अध्यापनाची गुणवत्ता, संशोधन उपक्रम, विद्यार्थी विकास कार्यक्रम आणि संस्थेची एकूण प्रगती यांचे सर्वंकष मूल्यमापन करण्यात आले. या प्रक्रियेत विद्यार्थ्यांचा सर्वांगीण विकास, त्यांना घडवणारे विविध उपक्रम, परीक्षा निकाल, महाविद्यालय गुणवत्ता यादीतील विद्यार्थ्यांचे स्थान, राबविल्या जाणाऱ्या विद्यार्थी हिताच्या योजना, अद्ययावत ग्रंथालय आणि पायाभूत सोयी-सुविधा, तसेच शिक्षक व शिक्षकेत्तर कर्मचाऱ्यांसाठी उपलब्ध सुविधा या निकषांवर महाविद्यालयाची पारख करण्यात आली. त्याचबरोबर प्राध्यापकांचे राष्ट्रीय-आंतरराष्ट्रीय पातळीवरील शोधनिबंध, प्लेसमेंट मुलाखतीद्वारे विद्यार्थ्यांना मिळवून दिलेल्या नोकरीच्या संधी या सर्वांची सखोल तपासणी करून कुलगुरूंनी गठित केलेल्या समितीने महाविद्यालयास ‘अ’ दर्जा बहाल केला आहे.
विशेष म्हणजे, हे महाविद्यालय यापूर्वीच ‘नॅक’कडून (NAAC) ‘अ’ दर्जा प्राप्त असून, नंदुरबार जिल्ह्यातील ‘नॅक’च्या तिसऱ्या फेरीत ‘अ’ दर्जा मिळवणारे कबचौ उमवि कार्यक्षेत्रातील हे एकमेव महाविद्यालय आहे. या यशाबद्दल पूज्य साने गुरुजी विद्या प्रसारक मंडळाचे अध्यक्ष बापूसाहेब दीपकभाई पाटील, उपाध्यक्ष जगदीश पाटील, मंडळाचे संचालक मयूरभाई दीपक पाटील, शैक्षणिक व सामान्य प्रशासन विभागाचे समन्वयक प्रा. मकरंद पाटील, प्राचार्य डॉ. एम. के. पटेल आणि संस्थेच्या सर्व पदाधिकाऱ्यांनी समाधान व्यक्त केले आहे. महाविद्यालयाचा गुणात्मक दर्जा राखण्यासाठी सहकार्य करणाऱ्या विद्यार्थी, माजी विद्यार्थी, शिक्षक आणि शिक्षकेत्तर कर्मचाऱ्यांचे प्राचार्य डॉ. एम. के. पटेल यांनी आभार मानले आहेत.
।। विशेष चौकट ।।
“मंडळाचे संस्थापक स्वर्गीय अण्णासाहेब पी. के. पाटील यांच्या ‘थांबला तो संपला’ या सूत्रावर आधारित आमच्या सर्व ज्ञानशाखांची वाटचाल सुरू आहे. शैक्षणिक अंकेक्षणात मिळालेला ‘अ’ दर्जा ही आमच्यासाठी अभिमानास्पद बाब आहे. महाविद्यालयाची शैक्षणिक गुणवत्ता उंचावण्यासाठी आणि विद्यार्थ्यांना जास्तीत जास्त सोयी-सुविधा उपलब्ध करून देण्यासाठी संस्था नेहमीच आग्रही असते आणि याचा सकारात्मक परिणाम महाविद्यालयाच्या प्रगतीत दिसून येत आहे.”
-बापूसाहेब दीपकभाई पाटील (अध्यक्ष, पूज्य साने गुरुजी विद्या प्रसारक मंडळ, शहादा)
“कवयित्री बहिणाबाई चौधरी उत्तर महाराष्ट्र विद्यापीठाच्या अंकेक्षणातून मिळालेला ‘अ’ दर्जा हा आमच्या सामूहिक आणि प्रामाणिक प्रयत्नांचा विजय आहे. संस्थेच्या व्यवस्थापन मंडळाचे नेहमीच गुणात्मक विकासासाठी मार्गदर्शन व प्रोत्साहन लाभत असते. विद्यार्थी हिताला प्राधान्य देत, भविष्यातही नवनवीन उपक्रम राबवून महाविद्यालयाचा नावलौकिक वाढवण्यासाठी आम्ही कटिबद्ध आहोत.
-प्रा. मकरंद पाटील (समन्वयक, शैक्षणिक व सामान्य प्रशासन विभाग, शहादा)
