शहादा, दि. 05 (प्रतिनिधी) – शहरातील मूलभूत सुविधांच्या प्रश्नावर शहादा नगर परिषदेच्या उपाध्यक्षा सौ. माधवीताई मकरंद पाटील यांनी आक्रमक भूमिका घेत संबंधित अधिकाऱ्यांना स्पष्ट निर्देश दिले आहेत. बिरसा मुंडा चौक व डोंगरगाव चौफुली येथील बंद पडलेले हाय-मास्ट स्ट्रीट लाईट तातडीने सुरू करण्याबरोबरच पावसाळ्याच्या पार्श्वभूमीवर एनएच 752 जी महामार्गावरील नाल्यांची स्वच्छता करण्याची मागणी त्यांनी केली.
गेल्या अनेक दिवसांपासून या वर्दळीच्या ठिकाणी स्ट्रीट लाईट बंद असल्यामुळे रात्रीच्या वेळी वाहनचालक व नागरिकांना अडचणींचा सामना करावा लागत आहे. तसेच पावसाळा जवळ येत असल्याने नाल्यांची स्वच्छता न झाल्यास पाणी तुंबण्याचा धोका निर्माण होऊ शकतो, अशी चिंता व्यक्त करण्यात आली.
या पार्श्वभूमीवर सौ. माधवीताई पाटील यांनी नगरसेवकांसह अधिकाऱ्यांची बैठक घेऊन कामात होत असलेल्या दिरंगाईबद्दल नाराजी व्यक्त केली. एमएसआरडीसीचे कार्यकारी अभियंता धनंजय जाधव, उपअभियंता श्री. पवार, एचजी इन्फ्रास्ट्रक्चरचे प्रकल्प संचालक विजय कुमार तसेच संबंधित विभागांचे अधिकारी या बैठकीस उपस्थित होते.
पावसाळ्यापूर्वी सर्व तांत्रिक अडचणी दूर करून कामे पूर्ण करण्याचे आदेश देत नागरिकांची गैरसोय टाळण्यावर भर देण्यात आला. नगर परिषदेचे इलेक्ट्रिकल इंजिनिअर योगेश वाडिले आणि महावितरणचे अभियंता पुष्पेंद्र पाडवी यांनीही यावेळी आपले मत मांडले.
लोकप्रतिनिधींच्या या आक्रमक भूमिकेमुळे संबंधित विभाग सक्रिय झाला असून, स्ट्रीट लाईट दुरुस्ती व नाले सफाईची कामे लवकर पूर्ण करण्याचे आश्वासन देण्यात आले आहे. या पाठपुराव्यामुळे नागरिकांमध्ये समाधान व्यक्त होत असून, कामांची अंमलबजावणी कितपत वेगाने होते याकडे सर्वांचे लक्ष लागले आहे.
