कुंडी (प्रतिनिधी) – कुंडी गावच्या सरपंच सौ. कल्पनाताई कैलासराव मोगल यांनी आपल्या कुटुंबीयांसह सामाजिक बांधिलकी जपत एक आगळावेगळा उपक्रम राबवला आहे. कै. सिंधुताई सुधाकरराव मोगल यांच्या स्मरणार्थ आयोजित गोड जेवणानिमित्त त्यांनी शाळेतील विद्यार्थ्यांना शैक्षणिक साहित्य भेट दिले.
दि. 4 एप्रिल 2026 रोजी जिल्हा परिषद प्राथमिक शाळा कुंडी येथे इयत्ता चौथीच्या विद्यार्थ्यांना शिष्यवृत्ती परीक्षेची पुस्तके तर इयत्ता पाचवीच्या विद्यार्थ्यांना नवोदय प्रवेश परीक्षेची पुस्तके वाटप करण्यात आली.
गोड जेवणाच्या पारंपरिक खर्चात कपात करून तो निधी शैक्षणिक उपक्रमासाठी वापरण्यात आल्याने या उपक्रमाचे विशेष कौतुक होत आहे. शिक्षणाला प्रोत्साहन देणारा हा उपक्रम गावात एक नवा आदर्श निर्माण करणारा ठरला आहे.
मोगल कुटुंबीयांचे शैक्षणिक व सामाजिक कार्य नेहमीच उल्लेखनीय राहिले असून या उपक्रमातून विद्यार्थ्यांच्या भविष्यासाठी सकारात्मक दिशा देण्याचा प्रयत्न करण्यात आला आहे.
शाळेचे मुख्याध्यापक रामराव गायकवाड, सर्व शिक्षक व ग्रामस्थांनी या उपक्रमाचे मनःपूर्वक कौतुक केले असून मोगल कुटुंबियांना या दुःखातून सावरण्याची शक्ती मिळो, अशी भावना व्यक्त करण्यात आली.
