आजरा : पुणे जिल्ह्यातील नसरापूर आणि कोल्हापूर जिल्ह्यातील पुलांची शिरोली येथे घडलेल्या महिला व मुलींवरील अत्याचाराच्या घटनांचा तीव्र निषेध करत, आरोपींना कठोर शिक्षा व्हावी अशी मागणी आजरा पंचायत समितीच्या उपसभापती सौ. यशोदा युवराज पोवार यांनी केली आहे.
या संदर्भात त्यांनी मुख्यमंत्री आणि गृहमंत्री यांना उद्देशून निवेदन आजरा तहसीलदार कार्यालयात सादर केले. निवेदनात या घटनांचा उल्लेख करत समाजमन हादरवणाऱ्या प्रकारांवर तीव्र चिंता व्यक्त करण्यात आली आहे.
नसरापूर येथे ३ वर्षांच्या चिमुरडीवर अत्याचार करून तिची हत्या झाल्याची घटना अत्यंत निंदनीय असल्याचे नमूद करण्यात आले आहे. तसेच कोल्हापूर जिल्ह्यातील पुलांची शिरोली येथे काही तरुणांकडून मुलींचे लैंगिक शोषण करून त्याचे व्हिडिओ व्हायरल केल्याच्या प्रकाराचाही निषेध करण्यात आला आहे.
अशा घटनांमुळे समाजात भीतीचे वातावरण निर्माण होत असून महाराष्ट्राच्या सामाजिक संस्कृतीला धक्का बसत असल्याचे निवेदनात म्हटले आहे.
या प्रकरणातील आरोपींवर फास्ट ट्रॅक कोर्टात खटला चालवून त्यांना लवकरात लवकर कठोर शिक्षा व्हावी, जेणेकरून भविष्यात अशा घटनांना आळा बसेल, अशी ठाम मागणी उपसभापती यशोदा पोवार यांनी केली आहे.
यावेळी प्रशासकीय अधिकारी व कर्मचारी उपस्थित होते.
