श्रीगोंदा (प्रतिनिधी):
श्रीगोंदा तालुक्यातील जिल्हा परिषद प्राथमिक शाळा, उंडेमळा येथे विद्यार्थ्यांच्या सर्वांगीण विकासासाठी राबविण्यात येत असलेले विविध उपक्रम अत्यंत कौतुकास्पद असून इतर शाळांनी त्यांचा आदर्श घ्यावा, असे प्रतिपादन वसमत (जि. हिंगोली) येथील गटविकास अधिकारी प्रफुल्ल तोटेवाड यांनी केले.
मुख्यमंत्री समृद्ध ग्रामपंचायत राज अभियान तपासणी समितीने मढेवडगाव येथील उंडेमळा शाळेला भेट देऊन विविध उपक्रमांची पाहणी केली. यामध्ये हस्ताक्षर सुधार प्रकल्प, अप्रगत विद्यार्थ्यांसाठी झटपट वाचन प्रकल्प, कुशाग्र विद्यार्थ्यांसाठी स्पर्धा परीक्षा मार्गदर्शन, तज्ज्ञ व्याख्याने, शिवजयंती उत्सव, किल्ले बनवा स्पर्धा तसेच “मिशन आपुलकी” अंतर्गत लोकसहभागातून शाळा विकास या उपक्रमांचा समावेश होता.
शाळेतील सीसीटीव्ही यंत्रणा, स्वच्छता संकुल, वॉटर फिल्टर सुविधा, डिजिटल शिक्षण व्यवस्था, स्वच्छ व सुंदर परिसर, शालेय नोंदी तसेच पालक गटाच्या माध्यमातून विद्यार्थ्यांचा दैनंदिन अभ्यास याबाबत अधिकाऱ्यांनी समाधान व्यक्त केले.
या वेळी मुख्याध्यापक तथा राष्ट्रपती पुरस्कार प्राप्त रामदास ठाकर यांनी उपस्थितांचे स्वागत केले. शाळेच्या सर्वांगीण प्रगतीमध्ये शिक्षक, पालक आणि ग्रामपंचायत यांचा सक्रिय सहभाग असल्याचे त्यांनी सांगितले.
या पाहणी दौऱ्यात सहाय्यक गटविकास अधिकारी एम. पी. पाटील, विस्तार अधिकारी आदिनाथ पांचाळ, बाळासाहेब कदम, काकासाहेब खोसे, एम. ए. वाघ, सारिका हराळ, डी. ए. मांढरे, बाल विकास प्रकल्प अधिकारी शालन थोरात, पर्यवेक्षिका पूजा पाडळे, ग्रामपंचायत अधिकारी दिनेश अलगुंडे, रामप्रसाद काळे, संगणक ऑपरेटर ज्ञानेश्वर डोके यांच्यासह अनेक अधिकारी उपस्थित होते.
ग्रामपंचायत स्तरावर लोकनियुक्त सरपंच प्रमोद शिंदे, उपसरपंच सुनिता उंडे, माजी उपसरपंच अमोल गाढवे, ग्रामपंचायत सदस्य योगेश शिंदे, सचिन उंडे तसेच शालेय व्यवस्थापन समितीच्या उपाध्यक्षा श्रद्धा गायकवाड यांच्यासह अनेक मान्यवर उपस्थित होते.
कार्यक्रमाचे आभार प्रदर्शन सहशिक्षक संतोष इंगावले यांनी केले.
