धुळे (प्रतिनिधी):
महात्मा फुले कृषी विद्यापीठ, राहुरीचे सन्माननीय कुलगुरू डॉ. विलासजी खर्चे यांनी कृषी विज्ञान केंद्र (KVK), धुळे येथे भेट देऊन केंद्रातील विविध कृषी उपक्रमांची पाहणी केली. शेतकरी हिताच्या योजनांना गती देणे आणि विस्तार कार्याचा आढावा घेणे हा या भेटीचा प्रमुख उद्देश होता.
भेटीदरम्यान कुलगुरूंनी केंद्राच्या प्रक्षेत्रावरील विविध प्रकल्पांची सखोल पाहणी केली. यामध्ये शेळीपालन प्रकल्प व गोट गॅलरीचे उद्घाटन, “संतुलित खत वापर जागरूकता अभियान–2026” भित्तीपत्रिकेचे विमोचन, तसेच एकात्मिक कीड व रोग व्यवस्थापन युनिट, नैसर्गिक शेतीतील निविष्ठा उत्पादन प्रकल्प, गांडूळ खत उत्पादन प्रकल्प आणि फळझाडे व भाजीपाला रोपवाटिका यांचा समावेश होता.
यानंतर झालेल्या बैठकीत वरिष्ठ शास्त्रज्ञ व प्रमुख डॉ. दिनेश नांद्रे यांनी केंद्राचा प्रगती अहवाल सादर केला. यावेळी कुलगुरूंनी शास्त्रज्ञ व कर्मचाऱ्यांशी संवाद साधत हवामान अनुकूल शेती, संतुलित खत वापर, नैसर्गिक शेतीचा प्रसार आणि एकात्मिक शेती पद्धती विकसित करण्यावर विशेष भर दिला.
तसेच संशोधनातील तंत्रज्ञान थेट शेतकऱ्यांपर्यंत पोहोचवण्यासाठी नाविन्यपूर्ण विस्तार पद्धती अवलंबण्याचे निर्देश त्यांनी दिले. ग्रामीण युवकांसाठी कृषी-उद्योजकता विकास प्रशिक्षण, शेतकरी उत्पादक संघटनांना (FPO) तांत्रिक पाठबळ, तसेच विद्यापीठाच्या गुणवत्तापूर्ण निविष्ठा विक्री केंद्राद्वारे शेतकऱ्यांपर्यंत सुविधा पोहोचवण्यावरही त्यांनी भर दिला.
‘फुले समृद्धी ग्राम’ संकल्पनेअंतर्गत विविध विभागांच्या समन्वयातून प्रभावी अंमलबजावणी करण्याचेही त्यांनी मार्गदर्शन केले. केव्हीके, धुळे येथील प्रशिक्षण कार्यक्रमांबाबत समाधान व्यक्त करत कुलगुरूंनी पुढील हंगामासाठी शुभेच्छा दिल्या.
या वेळी विद्यापीठ अभियंता श्री. मिलिंद ढोके, शासकीय कृषी महाविद्यालय, धुळेचे सहयोगी अधिष्ठाता डॉ. बबनराव इल्हे, विविध विभाग प्रमुख, कर्मचारी तसेच कृषी विज्ञान केंद्रातील सर्व शास्त्रज्ञ व अधिकारी उपस्थित होते.
