शहादा (प्रतिनिधी) – ओंकार साखर कारखाना उद्योग समूह हा शेतकऱ्यांना सर्वाधिक बाजारभाव देणारा आणि सातत्याने विस्तार करणारा उद्योग समूह म्हणून राज्यात ओळखला जात असून, समूहाची घोडदौड कायम असल्याची माहिती व्यवस्थापनाने दिली आहे.
उद्योग समूह महाराष्ट्रासह कर्नाटक, तेलंगणा आणि उत्तर प्रदेशमध्ये साखर कारखाने यशस्वीरीत्या चालवत असून, एकूण १७ कारखाने कार्यरत आहेत. आगामी काळात ही संख्या २२ पर्यंत नेण्याचे उद्दिष्ट ठेवण्यात आले आहे.
मोठ्या प्रमाणात गाळप आणि आर्थिक व्यवहार
मा. बाबुराव बोत्रे पाटील यांच्या नेतृत्वाखाली समूहाने अनेक बंद पडलेले कारखाने भाडेतत्त्वावर घेऊन पुन्हा सुरू केले आहेत. सध्या सुमारे १८ हजार कामगार, २.९५ लाख टोळी चालक व कामगार आणि ८ लाख शेतकऱ्यांचा या उद्योगाशी संबंध असल्याचे सांगण्यात आले आहे. यावर्षी सुमारे ७५ लाख टन उसाचे गाळप करण्यात आले आहे.
अफवांवर तीव्र आक्षेप
सोशल मीडियावर समूहाबाबत चुकीची आणि दिशाभूल करणारी माहिती पसरवली जात असल्याचा आरोप करत व्यवस्थापनाने तीव्र निषेध नोंदवला आहे. २ ते ३ हजार कोटी रुपयांच्या थकबाकीच्या अफवा निराधार असल्याचे स्पष्ट करण्यात आले आहे.
समूहाकडून यावर्षी सुमारे १८३० कोटी रुपये पेमेंट शेतकऱ्यांना देण्यात आले असून, वाहतूकदारांना ७१० कोटी रुपये अदा केल्याचेही सांगण्यात आले आहे.
कायदेशीर कारवाईचा इशारा
समूहाचे प्रतिनिधी ओमराजे बोत्रे पाटील यांनी सांगितले की, अफवा पसरवणाऱ्यांविरुद्ध कठोर कायदेशीर कारवाई सुरू करण्यात आली आहे. काही प्रकरणांमध्ये गुन्हेही दाखल करण्यात आले असून पुढे अब्रूनुकसानीचे दावे दाखल केले जाणार आहेत.
रविराज साबळे पाटील यांच्यावर सोशल मीडियाद्वारे बदनामी केल्याचा आरोप असून त्यांच्याविरोधातही कायदेशीर पावले उचलण्यात आल्याचे सांगण्यात आले.
पुढील नियोजन
केंद्र सरकारच्या इथेनॉल मिश्रण धोरणामुळे काही आर्थिक व्यवहारांमध्ये तात्पुरता विलंब झाल्याचे स्पष्ट करत, पुढील आठवड्यात सर्व शेतकरी, कामगार व वाहतूकदारांचे देयके पूर्ण करण्याचे आश्वासन देण्यात आले आहे.
शेतकऱ्यांनी कोणत्याही अफवांवर विश्वास न ठेवता अधिकृत माहिती थेट कारखान्याकडून घ्यावी, असे आवाहनही व्यवस्थापनाने केले आहे.
