शहादा (प्रतिनिधी) – शहादा येथील व्हॉलंटरी कला, वाणिज्य आणि विज्ञान कनिष्ठ महाविद्यालयात इयत्ता १२ वी परीक्षेत घवघवीत यश मिळवलेल्या गुणवंत विद्यार्थ्यांचा सत्कार समारंभ उत्साहात आणि दिमाखात पार पडला.
सन 2025-26 शैक्षणिक वर्षात उल्लेखनीय यश संपादन केलेल्या विद्यार्थ्यांचा गौरव करण्यासाठी या विशेष कार्यक्रमाचे आयोजन करण्यात आले होते. कार्यक्रमाचे प्रमुख पाहुणे म्हणून शहादा पंचायत समितीचे गटशिक्षण अधिकारी डॉ. योगेश सावळे उपस्थित होते. अध्यक्षस्थानी महिला मंडळ संस्थेचे सचिव अॅड. राजेश कुलकर्णी होते.
कार्यक्रमाच्या सुरुवातीला मान्यवरांच्या हस्ते दीपप्रज्वलन करून उद्घाटन करण्यात आले. यावेळी उपस्थित मान्यवरांनी विद्यार्थ्यांचे अभिनंदन करत त्यांच्या पुढील शैक्षणिक वाटचालीस शुभेच्छा दिल्या. शिक्षकांचे मार्गदर्शन आणि पालकांचे सहकार्य हे यशामागचे महत्त्वाचे घटक असल्याचेही त्यांनी नमूद केले.
या कार्यक्रमाला माजी मुख्याध्यापिका प्रतिभा भावसार, ताराबाई बेलदार, मुख्याध्यापिका प्रतिभा बोरसे, प्राचार्य नयना पाटील आणि इंग्लिश मीडियमच्या प्राचार्य पद्मा पाटील यांची प्रमुख उपस्थिती होती. तसेच शिक्षकवृंद, कर्मचारी आणि पालक मोठ्या संख्येने उपस्थित होते.
गुणवंत विद्यार्थ्यांमध्ये अमेय योगेश सावळे, श्रद्धा प्रमोद पाटील, युगांत कुणाल बारी, चेतन राजेश पाटील, धन्य राजेश चौगावकर आणि उन्नती दिनेश तांबोळी यांचा विशेष सत्कार करण्यात आला.
कार्यक्रमाचे संचालन शिक्षकवृंदाने केले असून संपूर्ण सोहळा उत्साही वातावरणात पार पडला.
