दोषींवर कारवाई करा व शाळेची मान्यता रद्द करण्याची मागणी
अक्राणी प्रतिनिधी : कै.एमडी सोनवणे अनुदानित आदिवासी आश्रम शाळा, त-हाडी तालुका शहादा येथील विद्यार्थी प्रतीक निमा वळवी इयत्ता ४ थी याच्यावर मुत्राशयाला दोरी बांधून झालेल्या अमानवीय वागणूक व शिक्षकांच्या निष्काळजीपणाबाबत योग्य ती कारवाई करावी व आश्रमशाळेची मान्यता रद्द करावी, अशी मागणी बिरसा फायटर्स संघटनेकडून अपर आयुक्त आदिवासी विकास भवन नाशिक यांच्या कडे निवेदन देऊन करण्यात आली आहे. यावेळी बिरसा फायटर्सचे राष्ट्रीय अध्यक्ष सुशिलकुमार पावरा, आदिवासी युवा संघटनेचे रूपसिंग वसावे, राष्ट्रीय आदिवासी स्वायत्त परिषद भारतचे महासचिव रोहीदास वळवी, जिल्हाध्यक्ष पंकज वळवी, नंदुरबार तालुका अध्यक्ष अजय वळवी, भारत आदिवासी संविधान सेनेचे कार्याध्यक्ष रविंद्र वळवी, दिलीप मुसळदे,मगन पावरा, दिनेश वसावे आदि कार्यकर्ते उपस्थित होते.
निवेदनात म्हटले आहे की, अनुदानित आदिवासी आश्रम शाळा, त-हाडी, ता. शहादा, जि. नंदुरबार येथील इयत्ता ४ थीत शिकणारा विद्यार्थी प्रतीक निमा वळवी याच्या मुत्राशयाला दोरी बांधून अत्यंत गंभीर व अमानवी प्रकार घडलेला आहे.दिनांक ०६/०२/२०२५ रोजी सदर विद्यार्थ्याच्या मुत्राशय म्हणजेच प्रायव्हेट भागाला दोरी बांधण्यात आली. हा प्रकार अत्यंत धोकादायक असूनही शाळेतील शिक्षकांनी या गंभीर प्रकाराकडे पूर्णतः दुर्लक्ष केले. दिनांक ०८/०२/२०२५ रोजी ही बाब उघडकीस आली, म्हणजे तीन दिवस विद्यार्थ्याला कोणतीही मदत मिळाली नाही किंवा औषधोपचार करण्यात आले नाहीत.या निष्काळजीपणामुळे विद्यार्थ्याची प्रकृती गंभीर झाली. त्याला प्रथम धुळे येथील रुग्णालयात दाखल करून ऑपरेशन करण्यात आले, परंतु ते यशस्वी झाले नाही. त्यानंतर नंदुरबार येथील खासगी रुग्णालयात पुन्हा ऑपरेशन करण्यात आले.तरी देखील संबंधित शाळेतील शिक्षकांनी या घटनेबाबत कोणतीही जबाबदारी घेतली नाही. उलट, विचारणा केल्यावर “एलसी घेऊन जा” शाळा सोडल्याचा दाखला देऊन जा,असे सांगून पालकांना व विद्यार्थ्याला मानसिक त्रास देण्यात येत आहे.
ही घटना अत्यंत गंभीर असून आदिवासी विद्यार्थ्यांच्या सुरक्षेबाबत मोठा प्रश्न निर्माण करते. त्यामुळे आपणास नम्र विनंती आहे की:१) या संपूर्ण घटनेची तात्काळ सखोल चौकशी करण्यात यावी.२) संबंधित दोषी शिक्षकांवर कडक कायदेशीर कारवाई करावी.३) पीडित विद्यार्थ्याला योग्य ती वैद्यकीय मदत व आर्थिक सहाय्य करण्यात ४) आश्रमशाळेची मान्यता रद्द करण्यात यावी ५) भविष्यात अशा घटना घडू नयेत यासाठी शाळेत कडक उपाययोजना कराव्यात.तरी आपण या प्रकरणात तात्काळ लक्ष घालून शाळेची मान्यता रद्द करावी,विद्यार्थी व पालकास न्याय द्यावा, अशी मागणी बिरसा फायटर्स संघटनेकडून अपर आयुक्तांकडे करण्यात आली आहे.निवेदनाची दखल घेऊन अपर आयुक्तांनी या प्रकरणी चौकशीचे आदेश दिले आहेत.
