शहादा (प्रतिनिधी, दि. 06 मे) :
शहादा नगरपालिकेची बुधवारी दुपारी 3 वाजता आयोजित करण्यात आलेली विशेष सर्वसाधारण सभा कोरमअभावी तहकूब करण्यात आली. जनता विकास आघाडी आणि भारतीय जनता पक्षाच्या काही नगरसेवकांच्या अनुपस्थितीमुळे आवश्यक सदस्यसंख्या पूर्ण न झाल्याने ही परिस्थिती निर्माण झाली.
ही विशेष सभा नगरपालिकेच्या स्व. काशिनाथ सजन पाटील सभागृहात आयोजित करण्यात आली होती. सभेला नगराध्यक्ष अभिजीत पाटील, प्रभारी मुख्याधिकारी हर्षल सोनवणे तसेच अधिकारी व कर्मचारी उपस्थित होते. मात्र ठराविक नगरसेवकांनी उपस्थिती न लावल्याने सभेसाठी आवश्यक कोरम पूर्ण होऊ शकला नाही.
पालिकेच्या नियमांनुसार एकूण सदस्यसंख्येच्या एक तृतीयांश सदस्यांची उपस्थिती अनिवार्य असते. 33 पैकी केवळ 12 नगरसेवकांनी अजेंडा स्वीकारल्याचे समोर आले, मात्र प्रत्यक्ष उपस्थिती नसल्याने सभा पुढे घेता आली नाही.
सभेचा अजेंडा 30 एप्रिल रोजी सर्व नगरसेवकांना पाठवण्यात आला होता आणि अधिकृत संकेतस्थळ व नोटीस बोर्डावरही प्रसिद्ध करण्यात आला होता, अशी माहिती प्रशासनाकडून देण्यात आली.
कोरमअभावी सभा तहकूब झाल्याने नियोजित विषयांवर चर्चा होऊ शकली नाही. पुढील सभेची तारीख लवकरच जाहीर केली जाणार असून, त्या निर्णयाकडे नगरपरिषद क्षेत्रातील नागरिकांचे लक्ष लागले आहे.
