दरेगाव (प्रतिनिधी) :
दरेगाव येथील सरपंच पती रवी मंटे यांच्या पुढाकाराने गेल्या दोन वर्षांपासून गावात विविध विकासकामांचा वेग वाढला आहे. ग्रामविकासाच्या दिशेने अनेक महत्त्वपूर्ण प्रकल्प हाती घेण्यात आले असून गावाचा सर्वांगीण विकास साधण्याचा प्रयत्न सुरू आहे.
ग्रामपंचायतीच्या माध्यमातून रोजगार हमी योजनेअंतर्गत विहिरी, घरकुल योजना, सिमेंट रस्ते, गावातील स्वच्छता मोहिमा तसेच रस्त्याच्या कडेला झाडे लावण्याचे काम करण्यात आले आहे. महादेव मंदिर परिसराचा विकास, शाळेची रंगरंगोटी आणि आदर्श योजनेतून फिल्टर पाण्याची सुविधा यांसारखी कामेही पूर्ण करण्यात आली आहेत.
गावातील काही रस्त्यांची कामे अद्याप बाकी असून ती लवकरच पूर्ण करण्यात येणार असल्याचे सरपंच पती रवी मंटे यांनी सांगितले. “सर्वसामान्य घटकातील शेवटच्या माणसापर्यंत विकास पोहोचवणे हे आमचे उद्दिष्ट आहे,” असेही त्यांनी स्पष्ट केले.
भविष्यात दरेगावाचा संपूर्ण चेहरामोहरा बदलून गावाला विकासाच्या नव्या उंचीवर नेण्याचा निर्धार त्यांनी व्यक्त केला आहे. तसेच कोणताही भेदभाव न करता सर्व नागरिकांना सन्मानाची वागणूक देण्याचे आश्वासनही त्यांनी दिले.
गावकऱ्यांनी सुरू असलेल्या विकासकामांबाबत समाधान व्यक्त केले असून पुढील कामांकडे लक्ष लागले आहे.
