कोपरगाव प्रतिनिधी :
कोपरगाव तालुक्यातील धामोरी येथील न्यू इंग्लिश स्कूल, धामोरी या विद्यालयाने इयत्ता दहावी (एस.एस.सी.) मार्च 2026 बोर्ड परीक्षेत 95.29 टक्के इतका दैदिप्यमान निकाल मिळवत उज्ज्वल यशाची परंपरा कायम राखली आहे. ग्रामीण भागातही दर्जेदार शिक्षण, शिस्तबद्ध वातावरण आणि शिक्षकांचे सातत्यपूर्ण मार्गदर्शन यामुळे हे यश शक्य झाल्याची भावना ग्रामस्थांनी व्यक्त केली.
या परीक्षेत एकूण 81 विद्यार्थी उत्तीर्ण झाले. त्यापैकी 18 विद्यार्थ्यांनी विशेष प्राविण्य (Distinction), 45 विद्यार्थ्यांनी प्रथम श्रेणी, 15 विद्यार्थ्यांनी द्वितीय श्रेणी तर 3 विद्यार्थ्यांनी उत्तीर्ण श्रेणी मिळवून विद्यालयाची शैक्षणिक पताका उंचावली आहे. विद्यार्थ्यांच्या या यशामुळे पालकांमध्ये समाधानाचे वातावरण असून संपूर्ण धामोरी गावात आनंद साजरा केला जात आहे.
विद्यालयातील शिक्षकांनी वर्षभर घेतलेले परिश्रम, अतिरिक्त तासिका, नियमित सराव परीक्षा, वैयक्तिक मार्गदर्शन आणि विद्यार्थ्यांच्या अडचणींचे सातत्याने निराकरण यामुळे हा उल्लेखनीय निकाल साध्य झाला. मुख्याध्यापकांच्या सक्षम नेतृत्वाखाली शिक्षक व शिक्षकेतर कर्मचाऱ्यांनी एकजुटीने काम करत विद्यार्थ्यांना उत्तम शैक्षणिक वातावरण उपलब्ध करून दिले.
या यशाबद्दल स्थानिक सल्लागार समिती तसेच न्यू इंग्लिश स्कूल धामोरीच्या सर्व पदाधिकाऱ्यांनी यशस्वी विद्यार्थ्यांचे अभिनंदन करत पुढील शैक्षणिक वाटचालीस शुभेच्छा दिल्या. तसेच विद्यालयाने 95 ते 100 टक्के निकालाची परंपरा सातत्याने कायम राखल्याबद्दल मुख्याध्यापक, शिक्षकवृंद व शिक्षकेतर कर्मचाऱ्यांचे विशेष कौतुक करण्यात आले.
धामोरी गावाच्या शैक्षणिक इतिहासात या निकालामुळे आणखी एक सुवर्ण अध्याय जोडला गेला असून आगामी काळातही विद्यालय अशीच यशस्वी कामगिरी करत राहील, असा विश्वास ग्रामस्थांनी व्यक्त केला.
