इगतपुरी | प्रतिनिधी
इगतपुरी तालुक्यातील शेणित येथे सुरू असलेल्या वारकरी संगीत गुरुकुलाचा तृतीय वर्धापन दिन आणि भव्य बालसंस्कार शिबिराचा सांगता कार्यक्रम दि. १२ मे २०२६ रोजी मोठ्या उत्साहात आणि भक्तिमय वातावरणात साजरा होणार आहे.
ह.भ.प. भूषण महाराज जाधव यांनी २०२३ मध्ये या गुरुकुलाची स्थापना केली. या गुरुकुलामध्ये सध्या शेकडो मुले-मुली टाळ, मृदुंग, गायन, कीर्तन आदी वारकरी कलेचे प्रशिक्षण घेत आहेत.
गुरुकुलाचे संस्थापक मृदुंग अलंकार ह.भ.प. भूषण म. जाधव आणि त्यांच्या अर्धांगिनी संगीत विशारद ह.भ.प. सौ. माधुरीताई भूषण जाधव यांनी शेणितसारख्या छोट्याशा गावात वारकरी संस्कार आणि संगीत जपण्याचे महत्त्वपूर्ण कार्य उभे केले आहे. दरवर्षी येथे भव्य बालसंस्कार शिबिराचे आयोजन करून विद्यार्थ्यांमध्ये संस्कार, अध्यात्म आणि कला यांची जोपासना केली जाते.
वर्धापनदिनानिमित्त महाराष्ट्र कीर्तन केसरी ह.भ.प. अमोल म. बडाख यांचे जाहीर कीर्तन आयोजित करण्यात आले आहे. तसेच या कार्यक्रमास ह.भ.प. डॉ. रामकृष्णदास म. लहवितकर, ह.भ.प. पंढरीनाथ म. सहाणे, ह.भ.प. मारोती म. कुर्हेकर, ह.भ.प. सुखदजी म. पुंडे यांच्यासह तालुक्यातील अनेक वारकरी भाविक उपस्थित राहणार आहेत.
नाशिक जिल्ह्यासह परिसरातील नागरिकांनी आणि पालकांनी आपल्या मुलांसह या गुरुकुलात सहभागी व्हावे, असे आवाहन गुरुकुलाचे संस्थापक ह.भ.प. भूषण म. जाधव यांनी केले आहे.
