पनवेल प्रतिनिधी :
पनवेल रेल्वे स्थानकावर मानवतेला काळीमा फासणारी धक्कादायक घटना उघडकीस आली आहे. एका तीन वर्षीय अपंग चिमुकलीला तिच्या आई-वडिलांनी रेल्वे स्थानकावर सोडून पलायन केल्याची घटना समोर आली असून, या प्रकारामुळे परिसरात संताप व्यक्त केला जात आहे.
स्थानकावर ही चिमुकली रडत असल्याचे तेथील कर्मचाऱ्यांच्या निदर्शनास आले. कर्मचाऱ्यांनी तिच्याशी संवाद साधण्याचा प्रयत्न केला असता, ती काहीच बोलू शकली नाही. तिने केवळ आपले नाव “शिवानी” असल्याचे सांगितले.
यानंतर पनवेल पोलिसांना माहिती देण्यात आली. पोलिसांनी स्थानक परिसरातील सीसीटीव्ही फुटेजची तपासणी केली असता, संबंधित आई-वडील चिमुकलीला स्थानकावर सोडून निघून गेल्याचे स्पष्ट झाले.
प्राथमिक तपासात ही मुलगी अंदाजे तीन वर्षांची असल्याचे समोर आले आहे. पोलिसांनी मुलीला ताब्यात घेऊन तिची काळजी घेतली असून, संबंधित आई-वडिलांचा शोध सुरू आहे.
या घटनेमुळे “इतके निर्दयी आई-वडील असू शकतात का?” असा सवाल नागरिकांकडून उपस्थित केला जात असून, समाजमाध्यमांवरही संताप व्यक्त करण्यात येत आहे.
