संख परिसरात थरारक गोळीबार; एमएसईबी कर्मचाऱ्याचा जागीच मृत्यू, दोन संशयित ताब्यात

जत प्रतिनिधी :

सांगली जिल्ह्यातील जत तालुक्यातील संख परिसरात शनिवारी पहाटे थरारक गोळीबाराची घटना घडली. या घटनेत महावितरण (MSEB) मध्ये लिपिक म्हणून कार्यरत असलेले संतोष उर्फ कुमार बिराजदार (वय ४३) यांचा मृत्यू झाला असून, परिसरात मोठी खळबळ उडाली आहे.

प्राथमिक माहितीनुसार, ही घटना शनिवारी मध्यरात्रीनंतर पहाटे साधारण दोन वाजण्याच्या सुमारास घडली. अज्ञात व्यक्तींनी संतोष बिराजदार यांच्यावर अत्यंत जवळून गोळीबार केला. गंभीर जखमी अवस्थेत त्यांना तातडीने उपचारासाठी हलविण्याचा प्रयत्न करण्यात आला, मात्र त्यापूर्वीच त्यांचा मृत्यू झाला.

घटनेची माहिती मिळताच संख पोलिसांनी तात्काळ घटनास्थळी धाव घेत परिसराची नाकाबंदी केली. पोलिसांनी वेगाने तपासाची चक्रे फिरवत दोन संशयित व्यक्तींना ताब्यात घेतले आहे.

या प्रकरणाचा पुढील तपास उमदी पोलीस करत असून, घटनास्थळाचा पंचनामा करून पुरावे गोळा करण्यात आले आहेत. तसेच परिसरातील सीसीटीव्ही फुटेजची तपासणी सुरू आहे.

हत्येमागील कारण अद्याप अस्पष्ट

या हत्येमागे नेमका कोणता हेतू होता, याचा शोध पोलीस घेत आहेत. परिसरात विविध चर्चांना उधाण आले असून, प्राथमिक स्तरावर ही घटना वैयक्तिक कारणांशी संबंधित असावी, अशी चर्चा सुरू आहे. मात्र, पोलिसांनी अद्याप कोणत्याही कारणाला अधिकृत दुजोरा दिलेला नाही.

या घटनेमुळे संख परिसरात भीतीचे वातावरण निर्माण झाले असून नागरिकांमध्ये चिंतेचे वातावरण आहे.