विक्रमगड प्रतिनिधी :
पालघर जिल्ह्यातील विक्रमगड तालुक्यातील खोमारपाडा येथे ‘शिवशक्ती गांडूळखत युनिट’चे उद्घाटन नुकतेच उत्साहात संपन्न झाले. मुथूट फायनान्स आणि श्री चैतन्य हेल्थ अँड केअर ट्रस्ट यांच्या संयुक्त विद्यमाने हा महत्त्वपूर्ण प्रकल्प उभारण्यात आला असून, यामुळे ग्रामीण भागात शाश्वत रोजगाराच्या नव्या संधी निर्माण होणार आहेत.
मान्यवरांची उपस्थिती
या उद्घाटन सोहळ्यास विक्रमगडचे तालुका कृषी अधिकारी मा. श्री. जगदीश दोंदे यांची प्रमुख उपस्थिती होती. तसेच मा. श्री. ठाकूर प्रभुजी, मा. श्री. तरुण नीताई प्रभूजी, मुथूट फायनान्स (CSR) चे मा. श्री. तुषार देशमुख, खोमारपाडाचे सरपंच मा. श्री. विलास गहला, शिवशक्ती ॲग्रो कंपनीचे मा. श्री. पार्थ सर, सुहृद फाउंडेशनचे मा. श्री. शरद दिवे आणि शिक्षक बाबू मोरे उपस्थित होते. यावेळी गावातील ग्रामस्थ मोठ्या संख्येने उपस्थित होते.
प्रकल्पाचे महत्त्व आणि फायदे
या गांडूळखत प्रकल्पामुळे परिसरातील शेतकऱ्यांना शेतीसाठी उपयुक्त आणि उच्च दर्जाचे सेंद्रिय खत स्थानिक पातळीवर उपलब्ध होणार आहे.
प्रकल्पाची प्रमुख उद्दिष्टे पुढीलप्रमाणे आहेत :
- स्थिर व्यवसायाची संधी : गावातील युवक आणि नागरिकांना रोजगाराची नवी दिशा मिळणार आहे.
- विषमुक्त शेतीला चालना : रासायनिक खतांचा वापर कमी करून सेंद्रिय शेतीचा प्रसार होणार आहे.
- जमिनीचा कस सुधारणा : गांडूळखतामुळे जमिनीचा पोत सुधारून उत्पादनक्षमता वाढण्यास मदत होणार आहे.
उपस्थित मान्यवरांनी या उपक्रमाचे कौतुक करत ग्रामीण विकासासाठी अशा प्रकल्पांची आवश्यकता असल्याचे मत व्यक्त केले. मुथूट फायनान्स आणि श्री चैतन्य हेल्थ अँड केअर ट्रस्टचा हा उपक्रम ग्रामीण भागासाठी प्रेरणादायी ठरत असल्याचे सांगण्यात आले.
या प्रकल्पामुळे खोमारपाडा गावाची ओळख आता “विषमुक्त शेतीकडे वाटचाल करणारे गाव” म्हणून निर्माण होत आहे.
