वर्धा जिल्ह्यातील शासकीय धान्य गोदामांमध्ये अन्नधान्य हाताळणीचे काम करणाऱ्या हमाल कामगारांसाठी दिलासादायक निर्णय घेण्यात आला असून, माहे फेब्रुवारी २०१७ ते डिसेंबर २०२० या कालावधीतील ३० टक्के लेव्हीची थकीत रोख रक्कम अदा करण्यास शासनाने मंजुरी दिली आहे. या निर्णयामुळे हमाल कामगारांना एकूण रु. १,७५,३५,१९६ इतकी रक्कम मिळणार आहे.
हिंगणघाट विधानसभा क्षेत्राचे आमदार समीर कुणावार यांच्या सातत्यपूर्ण पाठपुराव्यामुळे हा प्रश्न मार्गी लागल्याची भावना हमाल कामगारांनी व्यक्त केली आहे.
जिल्हा पुरवठा अधिकारी, वर्धा यांनी हमाल कामगारांची थकीत देणी मंजुरीसाठी शासनाकडे प्रस्तावाद्वारे सादर केली होती. हे प्रकरण दीर्घकाळ प्रलंबित होते. सदर प्रकरणी आमदार समीर कुणावार यांनी शासन स्तरावर सातत्याने पाठपुरावा करत हमाल कामगारांचा न्याय्य प्रश्न सोडवण्यासाठी विशेष प्रयत्न केले.
सदर देयक मंजुरी मा. उच्च न्यायालयातील रिट पिटीशन क्र. ६७७३/२०१७ मधील अंतिम निर्णयाच्या अधीन राहून देण्यात आली असून, रकमेची परिगणना व तपासणी शासनाच्या प्रचलित नियम व धोरणांनुसार करण्यात आल्याचे सांगण्यात आले आहे.
तसेच वित्त विभागाच्या शासन निर्णय दिनांक १७ एप्रिल २०१५ अन्वये वित्तीय अधिकार नियम पुस्तिका १९७८ मधील नियम क्र. ४० (१) अंतर्गत आवश्यक कार्यवाही करून शासनाने ही मंजुरी दिली आहे.
या निर्णयामुळे वर्धा जिल्ह्यातील शेकडो हमाल कामगारांना मोठा आर्थिक दिलासा मिळणार असून, अनेक वर्षांपासून प्रलंबित असलेली मागणी अखेर मार्गी लागल्याने कामगारांनी समाधान व्यक्त करत आमदार समीर कुणावार यांचे आभार मानले आहेत.
