कुरुंदवाड :
शिरोळ तालुक्यातील कुरुंदवाड येथील जुने एसटी स्टँडजवळ पवित्रा हॉटेलसमोरील बस थांब्याची अत्यंत दयनीय अवस्था झाली असून प्रवाशांना झाडाच्या सावलीत उभे राहून बसची वाट पाहावी लागत आहे. त्यामुळे नागरिकांमधून तीव्र नाराजी व्यक्त होत आहे.
सदर बस थांब्याचे उद्घाटन तत्कालीन आमदारांच्या हस्ते करण्यात आले होते. मात्र सुरुवातीपासूनच हा बस थांबा अपूर्ण अवस्थेत असल्याची तक्रार नागरिकांकडून केली जात होती. नवीन आणि सुसज्ज बस थांबा उभारण्याची मागणी अनेक वर्षांपासून होत असतानाही प्रशासनाने याकडे दुर्लक्ष केल्याने आज हा थांबा पूर्णपणे मोडकळीस आला आहे.
बस थांब्यावर बसण्यासाठी बाकडे किंवा खुर्च्यांची कोणतीही सुविधा नसल्याने प्रवासी तेथे थांबतच नाहीत. सध्या उन्हाळ्याचा कडाका वाढला असून तापमान ३९ ते ४० अंशांपर्यंत पोहोचत आहे. त्यामुळे नागरिक झाडांच्या सावलीत उभे राहून एसटीची वाट पाहताना दिसत आहेत.
ग्रामीण भागातील सर्वसामान्यांसाठी एसटी हेच एकमेव परवडणारे प्रवासाचे साधन मानले जाते. मात्र बसस्थानकात बसचे योग्य नियोजन नसल्याने बस वेळेवर येत नाहीत. परिणामी प्रवाशांना दीर्घकाळ उभे राहावे लागते. काही वेळाने कंटाळून प्रवासी रस्त्यावरच बसून राहतात. त्यातच अरुंद रस्ता आणि अतिक्रमण केलेली वाहने यामुळे वाहतुकीस मोठा अडथळा निर्माण होत आहे.
सामाजिक कार्यकर्ते, नागरिक आणि प्रवाशांनी एसटी प्रशासनाकडे नवीन व सुसज्ज बस थांबा उभारण्याची मागणी केली आहे. कुरुंदवाडच्या तुलनेत कोल्हापूर, जयसिंगपूर आणि नरसोबाची वाडी येथील बस थांबे अधिक चांगल्या सुविधांनी सुसज्ज असल्याचे नागरिकांनी सांगितले.
परिवहन मंत्री प्रतापराव सरनाईक यांनी स्वतः कुरुंदवाडला भेट देऊन येथील परिस्थिती पाहावी, अशी मागणीही नागरिकांकडून करण्यात येत आहे. तसेच प्रशासनाने तातडीने लक्ष घालून बस थांबे आणि बसस्थानक अद्ययावत करावे, अशी जोरदार मागणी प्रवासी वर्गातून होत आहे.
