प्रतिनिधी | वर्धा
सावंगी (मेघे) पोलिसांनी अवैध गावठी दारू वाहतुकीविरोधात मोठी कारवाई करत २ लाख २८ हजार रुपयांचा मुद्देमाल जप्त केला आहे. या कारवाईत दोन आरोपींना ताब्यात घेण्यात आले असून दोन दुचाकींसह गावठी मोहा दारू जप्त करण्यात आली.
सावंगी (मेघे) पोलीस स्टेशनचे पथक परिसरात पेट्रोलिंग करत असताना मुखबिराकडून खात्रीशीर माहिती मिळाली की, आरोपी आर्यन संदीप शंभरकर (वय १९, रा. पालोती, ता. जि. वर्धा) आणि जितू मारोती गायकवाड (वय ३८, रा. स्टेशनफैल, वर्धा) हे दुचाकीवरून गावठी मोहा दारूची अवैधरित्या वाहतूक करणार आहेत.
माहितीच्या आधारे पोलिसांनी सावंगी (मेघे) ते पालोती रोडवरील स्कूल ऑफ स्कॉलर्स समोर नाकाबंदी करून छापा टाकला. यावेळी दोन्ही आरोपींच्या ताब्यातून खालील मुद्देमाल जप्त करण्यात आला :
- हिरव्या रंगाची सुझुकी दुचाकी (MH-32-AZ-1671) किंमत अंदाजे १ लाख २० हजार रुपये
- २० लिटर गावठी मोहा दारू किंमत ४ हजार रुपये
- काळ्या रंगाची टीव्हीएस रेडॉन दुचाकी (MH-32-AP-7066) किंमत अंदाजे १ लाख रुपये
- २० लिटर गावठी मोहा दारू किंमत ४ हजार रुपये
असा एकूण २ लाख २८ हजार रुपयांचा मुद्देमाल पोलिसांनी जप्त केला.
या प्रकरणी दोन्ही आरोपींविरुद्ध गुन्हा दाखल करण्यात आला असून पुढील तपास सुरू आहे.
ही कारवाई पोलीस अधीक्षक सौरभ कुमार अग्रवाल, अप्पर पोलीस अधीक्षक सदाशिव वाघमारे आणि उपविभागीय पोलीस अधिकारी प्रमोद मकेश्वर यांच्या मार्गदर्शनाखाली सावंगी (मेघे) पोलीस स्टेशनचे ठाणेदार सहाय्यक पोलीस निरीक्षक पंकज वाघोडे, पोहवा अभय खोब्रागडे, पोशी शाम सलामे आणि पोशी गौरव नरताम यांनी केली.
