प्रतिनिधी | वर्धा
सुशिक्षित प्रकल्पग्रस्त बेरोजगारांच्या प्रलंबित मागण्यांसंदर्भात वर्धा येथे महत्त्वपूर्ण बैठक पार पडली. बेरोजगार संघटनेचे राज्य अध्यक्ष संजय धनाडे यांच्या नेतृत्वाखाली नगरपरिषदेच्या श्री अटल बिहारी वाजपेयी सभागृहात आयोजित या बैठकीला जिल्हाध्यक्ष राजेश शिरगरे, ॲड. नंदकिशोर वानखेडे, विनोद वेरूळकर यांच्यासह शेकडो प्रकल्पग्रस्त उपस्थित होते.
बैठकीत सुशिक्षित प्रकल्पग्रस्त बेरोजगारांच्या अनेक वर्षांपासून प्रलंबित असलेल्या मागण्यांवर चर्चा करण्यात आली. शासन स्तरावर या समस्या तातडीने निकाली काढण्यासाठी पुढील रणनीती ठरवण्यात आली.
संघटनेतर्फे नागपूर उच्च न्यायालयात दाखल करण्यात आलेल्या याचिकेची बाजू ॲड. लतीश कोठारी यांनी मांडली होती. या प्रकरणात उच्च न्यायालयाने प्रकल्पग्रस्तांना नोकरी अथवा अनुदान स्वरूपात मदत देण्याबाबत वन व महसूल विभागाला १२ आठवड्यांच्या आत निर्णय घेण्याचे निर्देश दिले होते. मात्र, मुदत उलटूनही शासनाकडून कोणतीही ठोस कार्यवाही करण्यात आलेली नसल्याचा आरोप बैठकीत करण्यात आला.
शासनाकडून उडवाउडवीची उत्तरे देऊन प्रकल्पग्रस्तांची दिशाभूल केली जात असल्याची भावना उपस्थितांनी व्यक्त केली. न्यायालयाच्या आदेशानंतरही शासनाने सकारात्मक भूमिका न घेतल्यामुळे आता अवमानना याचिका दाखल करण्याबाबत बैठकीत चर्चा करण्यात आली.
बैठकीत शेतकरी प्रकल्पग्रस्तांसाठी कलम २८ अंतर्गत असलेल्या तरतुदींवरही सविस्तर चर्चा झाली. प्रकल्पग्रस्त शेतकऱ्यांना अनुदान मिळवून देण्यासाठी मोठी मोहीम राबविण्याचा निर्णय घेण्यात आला असून, यासंदर्भातील प्रस्ताव भूसंपादन अधिकाऱ्यांकडे सादर करण्यात येणार आहेत.
तसेच या प्रश्नांवर तोडगा काढण्यासाठी महाराष्ट्र राज्याचे महसूल मंत्री चंद्रशेखर बावनकुळे यांच्यासोबत बैठक आयोजित करण्याचेही संघटनेच्या राज्याध्यक्षांनी जाहीर केले.
या बैठकीला मनिषा सुरस्कार, निकिता शेंडे, सचिन दहाट, शेखर जामूनकर, दिनेश डेहणे, रवींद्र खंडारे, पांडुरंग मलिये, गजानन बारापात्रे, शेख मोहसीन, शेख कदीर, डॉ. दुर्वास पानसे, सुधाकर डेहणे, राहुल काळे, वाल्मीक पांडे, उमाकांत आडकिने, शैलेश तलवारे, सुधाकर भोंगरे, भिमराव पावडे, संदीप उरकुडे, बंडू आडकिने, सुरज माते, सुनिल काळे, गौतम काळे, सुशिल पाटील, वसंत मंडवे, प्रशांत हेरोडे, देवानंद खंडारे, अतुल डहाके, सचिन तिडके तसेच बोरधरण प्रकल्पग्रस्त संघटनेचे शंकर पानबुडे, ज्ञानेश्वर कोडापे, दिलीप मेश्राम, संजय बोन्द्रे, ज्ञानेश्वर मेश्राम आदी उपस्थित होते.
