वर्धा प्रतिनिधी :
वर्धा शहर आणि जिल्ह्यात वाढत्या अपघातांच्या पार्श्वभूमीवर वाहतूक पोलिसांना आता अत्याधुनिक बॉडी वॉर्न कॅमेरे देण्यात आले आहेत. वाहनचालकांकडून होणारे वाहतूक नियमांचे उल्लंघन रोखण्यासाठी तसेच पोलिसांच्या सुरक्षेसाठी हा महत्त्वपूर्ण उपक्रम राबविण्यात आला आहे.
पोलीस अधीक्षक सौरभ कुमार अग्रवाल यांच्या मार्गदर्शनाखाली वाहतूक विभागाला हे कॅमेरे उपलब्ध करून देण्यात आले आहेत. अति वेगाने वाहन चालविणारे, दारू पिऊन वाहन चालविणारे तसेच मोटार वाहन कायद्याचे उल्लंघन करणाऱ्या चालकांवर कारवाई करताना आता फोटो, ऑडिओ आणि व्हिडिओ स्वरूपातील ठोस पुरावे संकलित केले जाणार आहेत.
हे बॉडी वॉर्न कॅमेरे वाहतूक पोलिसांच्या गणवेशावर लावण्यात येणार असून, कारवाईदरम्यान घडणाऱ्या प्रत्येक घटनेची नोंद त्यामध्ये होईल. विशेष म्हणजे, या कॅमेऱ्यातील रेकॉर्डिंगमध्ये कोणत्याही प्रकारचे एडिटिंग किंवा डिलीट करता येणार नसल्याने पारदर्शकता राखली जाणार आहे.
वाहतूक नियमांचे उल्लंघन केल्यानंतर काही वाहनचालकांकडून वादविवाद किंवा गैरवर्तन केले जाते. अशा घटनांचेही ऑडिओ-व्हिडिओ रेकॉर्डिंग होणार असल्यामुळे वाहतूक अंमलदारांच्या सुरक्षेलाही मोठी मदत होणार आहे. तसेच वरिष्ठ अधिकाऱ्यांनाही कारवाई योग्य पद्धतीने झाली की नाही यावर लक्ष ठेवता येणार आहे.
या उपक्रमामुळे वाहनचालकांनाही न्याय मिळण्यास मदत होणार असून, वाहतूक व्यवस्थेत अधिक पारदर्शकता येईल, असा विश्वास व्यक्त केला जात आहे.
वाहतूक शाखेच्या वतीने सर्व वाहनचालकांना वाहतूक नियमांचे पालन करून सुरक्षित प्रवास करण्याचे आवाहन करण्यात आले आहे.
