प्रतिनिधी |
बीड : मौजे बीड पिंगळे येथील सर्व्हे नं. १८८ मधील कथित बेकायदेशीर फेरफार प्रकरणामुळे शहरात मोठी चर्चा रंगली आहे. मंजूर विकास आराखड्यात प्ले ग्राउंड व म्हाडाचे आरक्षण असतानाही कथितपणे बोगस गुंठेवारी दाखवून अनधिकृत भूखंड तयार करून व्यवहार करण्यात आल्याचा गंभीर आरोप सामाजिक कार्यकर्त्या अनिता वानखडे यांनी केला आहे.
या संदर्भात संबंधित फेरफार आदेश तात्काळ रद्द करून संपूर्ण प्रकरणाची सखोल चौकशी करण्यात यावी, अशी मागणी त्यांनी विभागीय आयुक्तांकडे निवेदनाद्वारे केली आहे. सक्षम प्राधिकरणाची परवानगी न घेता हे व्यवहार करण्यात आल्याने हा प्रकार कायद्याच्या विरोधात असल्याचेही निवेदनात नमूद करण्यात आले आहे.
तसेच, या जागेवरील पुढील कोणतीही खरेदी-विक्री व नोंदणी प्रक्रिया तातडीने थांबविण्यात यावी, अशी मागणी करत प्रशासनाने कारवाई न केल्यास लोकशाही मार्गाने आंदोलन तसेच आमरण उपोषण छेडण्यात येईल, असा इशारा अनिता वानखडे यांनी दिला आहे.
“फेरफार थांबला पाहिजे आणि प्ले ग्राउंड व म्हाडाचे आरक्षण वाचले पाहिजे,” अशी ठाम भूमिका त्यांनी मांडली असून, नागरिकांमधूनही या प्रकरणात प्रशासनाने तातडीने हस्तक्षेप करून योग्य ती कार्यवाही करावी, अशी मागणी जोर धरू लागली आहे.
