अंबाजोगाई | प्रतिनिधी
अंबाजोगाई येथील ॲड जयसिंग चव्हाण संचलित बालनिकेतन सेमी इंग्लिश स्कूल व जीवन शिक्षण प्राथमिक विद्यालय यांच्या मुख्याध्यापिका सौ. अंजली संजय लोहिया यांना शिक्षण क्षेत्रातील उल्लेखनीय, मूल्याधिष्ठित आणि नाविन्यपूर्ण कार्याबद्दल “राज्यस्तरीय आदर्श शिक्षक पुरस्कार २०२६, पुणे” या प्रतिष्ठित पुरस्काराने सन्मानित करण्यात आले.
पुणे येथे आयोजित भव्य समारंभात मान्यवरांच्या उपस्थितीत हा पुरस्कार प्रदान करण्यात आला. पुरस्काराचे स्वरूप सन्मानचिन्ह व ट्रॉफी असे होते. पुरस्कार स्वीकारताना त्यांच्या समवेत मुलगा रोहनिल संजय लोहिया (युवा उद्योजक, पुणे), सौ. पलक भुतडा तसेच शुभम भुतडा (युवा उद्योजक, लातूर) उपस्थित होते.
विद्यार्थ्यांच्या सर्वांगीण विकासासाठी केलेले सातत्यपूर्ण प्रयत्न, गुणवत्ता वृद्धीसाठी राबविलेले उपक्रम, संस्कारक्षम शिक्षणाची जोपासना आणि विद्यार्थ्यांच्या उज्ज्वल भविष्यासाठी केलेल्या समर्पित कार्याची ही गौरवपूर्ण पावती मानली जात आहे.
सौ. अंजली लोहिया यांनी आपल्या कर्तृत्व, जिद्द, शिस्तबद्ध कार्यपद्धती आणि विद्यार्थ्यांप्रती असलेल्या अपार प्रेमामुळे शाळेची शैक्षणिक गुणवत्ता उंचावली आहे. त्यांच्या मार्गदर्शनाखाली अनेक विद्यार्थ्यांनी शैक्षणिक, सांस्कृतिक तसेच स्पर्धात्मक क्षेत्रात उल्लेखनीय यश संपादन केले आहे.
यावेळी बालनिकेतन शाळेचे अध्यक्ष ॲड जयसिंग चव्हाण म्हणाले की, “विद्यार्थ्यांना शिक्षण क्षेत्रात नेहमी काहीतरी नवीन शिकविण्यासाठी धडपड करणाऱ्या सौ. अंजली लोहिया यांचे कौतुक करावे तेवढे कमीच आहे.”
या यशाबद्दल संस्थेचे अध्यक्ष ॲड जयसिंग चव्हाण, संचालक श्री. अजित माने, शाळेतील शिक्षकवृंद, शिक्षकेतर कर्मचारी, विद्यार्थी व पालकांनी सौ. अंजली लोहिया यांचे अभिनंदन करून पुढील कार्यासाठी शुभेच्छा दिल्या.
या सन्मानामुळे संपूर्ण अंबाजोगाई शहरासह बालनिकेतन परिवाराच्या शिरपेचात मानाचा तुरा खोवला गेला असून, शिक्षण क्षेत्रात कार्यरत शिक्षकांसाठी हा प्रेरणादायी क्षण ठरला आहे.
