शिरपूर | प्रतिनिधी
राष्ट्रीय आरोग्य अभियान अंतर्गत तालुका आरोग्य अधिकारी, शिरपूर यांच्या मार्फत मौजे महादेव दोंडवाडा (ता. शिरपूर, जि. धुळे) येथे आशा स्वयंसेविका पदासाठी रिक्त जागा जाहीर करण्यात आली आहे. मात्र, या पदासाठी अर्ज करण्याकरिता आवश्यक असलेला ग्रामपंचायत ठराव देण्यास सरपंच आणि ग्रामसेवक जाणीवपूर्वक टाळाटाळ करत असल्याचा गंभीर आरोप ग्रामस्थांनी केला आहे.
याबाबत मा. गट विकास अधिकारी, पंचायत समिती शिरपूर यांना लेखी निवेदन सादर करण्यात आले. निवेदनात नमूद करण्यात आले आहे की, ग्रामसेवक श्री. विजय पाटील व सरपंच सौ. संगीता किसन पावरा हे पात्र महिलांना अर्जासाठी आवश्यक असलेला ग्रामपंचायत ठराव देण्यास नकार देत आहेत. तसेच “कोणाकडेही तक्रार करा, तरी ठराव देणार नाही,” अशा प्रकारची धमकीवजा भाषा वापरून मानसिक दबाव टाकल्याचा आरोपही करण्यात आला आहे.
ग्रामस्थांच्या म्हणण्यानुसार, संबंधित पदावर आपल्या जवळील व्यक्तीस प्राधान्य मिळावे या हेतूने इतर पात्र महिलांना अर्ज प्रक्रियेपासून दूर ठेवण्याचा प्रयत्न केला जात आहे. यापूर्वी दिनांक ५ मार्च २०२६ रोजीही पंचायत समितीकडे लेखी तक्रार सादर करण्यात आली होती. मात्र, अद्याप कोणतीही ठोस कार्यवाही झालेली नसल्याचा आरोप निवेदनातून करण्यात आला आहे.
तक्रारदारांनी प्रशासनाकडे पुढील मागण्या केल्या आहेत :
- संपूर्ण प्रकरणाची तात्काळ चौकशी करण्यात यावी.
- संबंधित सरपंच व ग्रामसेवकांना पंचायत समिती कार्यालयात बोलावून पात्र महिलांना त्वरित ग्रामपंचायत ठराव देण्याचे आदेश द्यावेत.
- पदाचा गैरवापर केल्याप्रकरणी संबंधितांवर शिस्तभंगाची व कायदेशीर कारवाई करावी.
- आवश्यक असल्यास भारतीय न्याय संहिता (BNS) अंतर्गत संबंधित कलमान्वये गुन्हा दाखल करावा.
तसेच, सदर तक्रार केल्याच्या कारणावरून सरपंच, ग्रामसेवक किंवा त्यांच्या कुटुंबीयांकडून आमच्या किंवा आमच्या कुटुंबातील सदस्यांना कोणतीही धमकी, दबाव, मानसिक त्रास, शारीरिक इजा किंवा शिवीगाळ झाल्यास त्याची संपूर्ण जबाबदारी संबंधित व्यक्तींवर राहील, अशी नोंदही निवेदनात करण्यात आली आहे.
निवेदन सादर करताना ग्रामस्थ नितेश पावरा, देवीलाल पावरा, दीपक पावरा, सागर पावरा, सुरत पावरा, लक्ष्मण पावरा व काजल पावरा आदी उपस्थित होते.
