निरा देवघर प्रकल्पाच्या उर्वरित टेंडरसाठी मुख्यमंत्रीांकडे मागणी; शिवराज पुकळे यांचा पुढाकार
माळशिरस | प्रतिनिधी
माळशिरस तालुक्यातील दुष्काळग्रस्त गावांना निरा देवघर प्रकल्पाचे पाणी मिळावे आणि उर्वरित टेंडर तातडीने काढण्यात यावेत, या मागणीसाठी भाजपा युवा मोर्चा सोलापूर ग्रामीण जिल्हाध्यक्ष शिवराज पुकळे यांनी ११ हजार सह्यांची जनमोहीम सुरू केली आहे.
पुण्यश्लोक अहिल्यादेवी चौक, चांदापुरी येथे बुधवार दि. १३ मे २०२६ रोजी सायंकाळी सात वाजता मोठ्या एलईडी स्क्रीनवर शिवराज पुकळे यांच्या विविध कामांचा आढावा दाखवण्यात आला. यावेळी ग्रामस्थांच्या उपस्थितीत निरा देवघर प्रकल्पाच्या उर्वरित कामांसाठी मुख्यमंत्रीांकडे टेंडर काढण्याची मागणी करणाऱ्या निवेदनावर सह्या घेण्यात आल्या.
माळशिरस तालुक्यातील बचेरी, सुळेवाडी, कोळेगाव, पिलीव, शिंगोर्णी, जळभावी, गारवड, मगरवाडी, पठाण वस्ती, चांदापुरी आदी कायम दुष्काळग्रस्त गावांना निरा देवघरचे पाणी पोहोचावे, ही या मोहिमेची प्रमुख मागणी आहे.
या उपक्रमात ग्रामस्थांनी उत्स्फूर्त सहभाग नोंदवत आपल्या सह्या करून प्रकल्प पूर्णत्वास नेण्याची मागणी केली.
यावेळी ग्रामपंचायत चांदापुरीचे सरपंच जयवंत अण्णा सूळ, उपसरपंच तात्यासाहेब चोरमले तसेच भारतीय जनता पक्षाचे कार्यकर्ते शाहिद भाई शेख, बापू सूळ, शिवाजी शेटे, अरुण बोडरे, मेहबूब पठाण, महादेव मिसाळ, सागर लोखंडे यांच्यासह ग्रामस्थ मोठ्या संख्येने उपस्थित होते.
