प्रतिनिधी :
गोपाळराव पाटील शिक्षण प्रसारक मंडळ, कळवा संचालित न्यू पिंपळोली हायस्कूलचा इयत्ता दहावीचा निकाल यंदा ८५.३६ टक्के लागला असून निकालात मुलींनी आपला दबदबा कायम राखला आहे. विशेष म्हणजे मासले बेलपाडा गावातील विद्यार्थिनींनी उल्लेखनीय यश संपादन करत सर्वांचे लक्ष वेधून घेतले आहे.
विद्यालयातील कु. किमया रमेश भोईर हिने ९४.२० टक्के गुण मिळवत प्रथम क्रमांक पटकावला, तर कु. नेहा विजय हरड हिने ८०.२० टक्के गुणांसह द्वितीय क्रमांक मिळवला. त्यांच्या या यशामुळे संपूर्ण मासले पंचायत क्षेत्रात आनंदाचे वातावरण निर्माण झाले असून विद्यार्थिनींचे सर्वत्र कौतुक होत आहे.
यशस्वी विद्यार्थिनींचे शाळा व्यवस्थापन, शिक्षकवृंद, पालक तसेच ग्रामस्थांकडून अभिनंदन करण्यात येत असून त्यांच्या पुढील शैक्षणिक वाटचालीस शुभेच्छा देण्यात येत आहेत.
