मुरबाड प्रतिनिधी :
मुरबाड तहसील (दुय्यम निबंधक) कार्यालय हे नागरिकांच्या सेवेसाठी आहे की तळीरामांचा अड्डा बनले आहे, असा सवाल आता नागरिकांकडून उपस्थित केला जात आहे. कार्यालय परिसरात विदेशी दारूच्या रिकाम्या बाटल्या आढळून आल्याने एकच खळबळ उडाली आहे.
मिळालेल्या माहितीनुसार, शिवळे येथील काही नागरिक तहसील कार्यालयात कामानिमित्त गेले असता त्यांना कार्यालयाच्या आवारात, आडगळीच्या जागांमध्ये तसेच शौचालय परिसरात विदेशी दारूच्या रिकाम्या बाटल्या दिसून आल्या. सरकारी कार्यालयाच्या परिसरात अशा प्रकारे दारूच्या बाटल्या आढळल्याने नागरिकांनी तीव्र नाराजी व्यक्त केली आहे.
सदर प्रकारामुळे कार्यालयाच्या शिस्त व स्वच्छतेवर प्रश्नचिन्ह निर्माण झाले असून, कार्यालय परिसरात नेमके काय सुरू आहे, असा सवालही उपस्थित होत आहे. सरकारी कार्यालयात येणाऱ्या नागरिकांना अशा प्रकारचे दृश्य पाहायला मिळणे ही अत्यंत गंभीर बाब असल्याचे मत नागरिकांनी व्यक्त केले.
या प्रकरणाची वरिष्ठ अधिकाऱ्यांकडून चौकशी करून संबंधितांवर योग्य ती कारवाई करण्यात यावी, तसेच कार्यालय परिसरात स्वच्छता व शिस्त राखण्यासाठी कठोर उपाययोजना कराव्यात, अशी मागणी नागरिकांकडून करण्यात येत आहे.
