पणदूर (प्रतिनिधी):
कुडाळ तालुक्यातील पणदूर येथील ‘सविता आश्रम’ सध्या एका धक्कादायक घटनेमुळे चर्चेत आला आहे. आश्रमातील एका अनाथ महिलेला कर्मचाऱ्यांकडून जबरदस्तीने ओढत नेऊन मारहाण करण्यात आल्याचा आरोप समोर आला असून, संबंधित घटनेचा व्हिडिओ सोशल मीडियावर मोठ्या प्रमाणात व्हायरल होत आहे. या प्रकारामुळे स्थानिक नागरिकांमध्ये संतापाचे वातावरण निर्माण झाले आहे.
मिळालेल्या माहितीनुसार, आश्रमातील एक महिला रस्त्यावर आली असता काही कर्मचाऱ्यांनी तिला जबरदस्तीने ओढत नेल्याचे व्हिडिओमध्ये दिसत आहे. यावेळी संबंधित महिलेला मारहाण झाल्याचाही आरोप करण्यात येत आहे. हा प्रकार पाहून स्थानिक नागरिकांनी हस्तक्षेप करत कर्मचाऱ्यांना जाब विचारला.
दरम्यान, संबंधित महिलेने “आश्रमात आम्हाला मारहाण केली जाते. भीतीपोटी मी आश्रमातून बाहेर पडले,” असा गंभीर आरोप केल्याचे सांगितले जात आहे. या वक्तव्यानंतर आश्रमातील इतर अनाथ व्यक्तींच्या सुरक्षिततेबाबतही प्रश्न उपस्थित होत आहेत.
स्थानिक नागरिकांच्या म्हणण्यानुसार, आश्रमातील काही व्यक्ती अनेकदा लोकवस्तीमध्ये भटकताना दिसतात. त्यामुळे परिसरात भीतीचे वातावरण निर्माण झाले असून, आश्रमाच्या कामकाजाबाबत नागरिकांनी नाराजी व्यक्त केली आहे. या संदर्भात आश्रमाचे संचालक संदीप परब यांच्याकडे विचारणा करण्यात आली असता त्यांनी कोणतीही स्पष्ट प्रतिक्रिया दिली नसल्याचे समोर आले.
या प्रकरणाची सखोल चौकशी करून आश्रमातील वास्तव परिस्थिती समोर आणावी, तसेच अनाथ व्यक्तींच्या सुरक्षिततेसाठी प्रशासनाने तातडीने पावले उचलावीत, अशी मागणी ग्रामस्थांकडून करण्यात येत आहे.
