खटाव प्रतिनिधी :
ग्रामीण भागातील युवक-युवतींना हक्काचा रोजगार मिळवून देण्यासाठी पुसेगाव येथील सह्याद्री क्रीडा मंडळ आणि नामवंत बेल राईस इंडस्ट्रीज लिमिटेड यांच्या संयुक्त विद्यमाने शनिवार, दि. १६ मे २०२६ रोजी भव्य रोजगार मेळाव्याचे आयोजन करण्यात आले आहे. या मेळाव्याच्या माध्यमातून परिसरातील सुमारे ३०० बेरोजगार युवक-युवतींना थेट कंपनीत रोजगाराची संधी उपलब्ध होणार असल्याने खटाव-कोरेगाव परिसरात उत्साहाचे वातावरण निर्माण झाले आहे.
हा रोजगार मेळावा सकाळी १० ते दुपारी २ या वेळेत हनुमानगिरी हायस्कूल, पुसेगाव येथे पार पडणार आहे. विशेष म्हणजे उमेदवारांच्या मुलाखती व निवड प्रक्रिया एकाच ठिकाणी घेण्यात येणार आहे.
मेळाव्यात सीएनजी ऑपरेटर, असेंबली ऑपरेटर, प्रेस ऑपरेटर, वेल्डर तसेच इतर तांत्रिक पदांसाठी भरती केली जाणार आहे. या पदांसाठी आठवी, दहावी, बारावी उत्तीर्ण, आयटीआय, डिप्लोमा तसेच विविध शाखांतील पदवीधर उमेदवार पात्र असणार आहेत. अनुभवी उमेदवारांसह फ्रेशर युवकांनाही प्राधान्य दिले जाणार असल्याची माहिती आयोजकांनी दिली.
उमेदवारांनी मेळाव्यास उपस्थित राहताना आपला बायोडाटा, शैक्षणिक प्रमाणपत्रे, आधार कार्ड तसेच पासपोर्ट साईज फोटो सोबत आणणे अनिवार्य असल्याचे आयोजकांकडून सांगण्यात आले आहे.
या रोजगार मेळाव्यामुळे ग्रामीण भागातील बेरोजगार युवक-युवतींना रोजगाराच्या नव्या संधी उपलब्ध होणार असून मोठ्या संख्येने उपस्थित राहण्याचे आवाहन आयोजकांनी केले आहे.
