प्रतिनिधी :
कुरुंदवाड : शुभारंभ फाउंडेशन, कुरुंदवाड या सेवाभावी संस्थेतर्फे इयत्ता दहावीमध्ये उत्तीर्ण झालेल्या गुणवंत विद्यार्थ्यांचा वही, पेन आणि गुलाब पुष्प देऊन सत्कार करण्यात आला. हा कार्यक्रम उत्साहपूर्ण वातावरणात पार पडला.
कार्यक्रमाच्या अध्यक्षस्थानी कुरुंदवाडचे नगरसेवक मा. जय ऊर्फ बाबासो कडाळे हे होते. त्यांच्या हस्ते गुणवंत विद्यार्थ्यांचा गौरव करण्यात आला. कार्यक्रमाच्या प्रारंभी धर्मवीर छत्रपती संभाजी महाराज यांच्या जयंतीनिमित्त प्रतिमेचे पूजन करण्यात आले.
यावेळी संस्थेचे सचिव दरिकांत कोळेकर यांनी मनोगत व्यक्त करताना सांगितले की, “शुभारंभ फाउंडेशनचे ब्रीदवाक्य ‘आधार माणुसकीचा’ असे असून, समाजातील सर्वसामान्य व्यक्तींना आधार देण्याचे कार्य संस्था सातत्याने करत आहे.”
मनोगतात श्री. उत्तम भोई म्हणाले की, ही संस्था सामान्य जनतेची असून समाजसेवेच्या भावनेतून कार्यरत आहे. नगरसेवक जय ऊर्फ बाबासो कडाळे यांनी संस्थेच्या कार्याचे कौतुक करत, “संस्थेला आणि नागरिकांना लागणारी मदत आम्ही निश्चित करू,” असे आश्वासन दिले. तसेच संस्थेच्या संचालकपदी निवड झालेल्या सौ. खरोसे मॅडम यांचा विशेष सत्कार करण्यात आला.
यावेळी विविध शाळांमधील गुणवंत विद्यार्थ्यांचा गौरव करण्यात आला. एस.पी. हायस्कूल, कुरुंदवाड येथील कु. श्रुती दत्तात्रय कुरुंदवाडे हिने ९८.६० टक्के गुण मिळवत केंद्रात प्रथम क्रमांक पटकावला. तसेच घोरपडे आदिती विजय हिने ९७.८० टक्के गुणांसह द्वितीय क्रमांक मिळवला, तर कुलकर्णी प्रथमेश जितेंद्र यांनी ९४.८० टक्के गुण प्राप्त केले.
माध्यमिक आश्रमशाळा, तेरवाड येथील प्रतीक प्रकाश लोटपाल (७८.८०%), इम्रान रमजान केरूरे (७१.८०%) आणि कु. बेफारी तनाज अशपाक (७०.६०%) यांनी अनुक्रमे प्रथम, द्वितीय आणि तृतीय क्रमांक मिळवला.
साने गुरुजी विद्यालय, कुरुंदवाड येथील कु. सिद्धी सारंग चव्हाण हिने ९५.८० टक्के गुण मिळवत प्रथम क्रमांक मिळवला. कु. श्रावणी महावीर मगदूम हिने ९४.८० टक्के, तर कु. प्रांजली प्रमोद कांबळे हिने ९०.४० टक्के गुण मिळवले. आलमा इकबाल उर्दू हायस्कूलमधील आफिया झाकीर बाणदार हिने ८३.४० टक्के गुण संपादन केले.
एकूण चार हायस्कूलमधील १२ गुणवंत विद्यार्थी-विद्यार्थिनींचा सत्कार करण्यात आला. कार्यक्रमाचे सूत्रसंचालन दरिकांत कोळेकर यांनी केले तर आभार प्रदर्शन विलास माळी यांनी मानले.
